„Арамија Мицкоски и Клековски ги кријат извештаите за водата - Сега умре и рибата во Треска“, вели СДСМ

СДСМ преку соопштение обвини дека граѓаните повеќе од десет недели чекаат на целосни и јавно достапни извештаи за квалитетот на водата, додека, како што велат од партијата, нов случај со угинување риба во реката Треска повторно ги отвора прашањата за состојбата со водите.

Од СДСМ потсетуваат на случувањата во Гостивар, каде, според нив, илјадници граѓани побарале медицинска помош, а околу 5.000 лица биле засегнати. Партијата тврди дека и по десет недели нема јавно објавен и потпишан извештај за квалитетот на водата кој би бил разбирлив за граѓаните.

— реклама —

„Го имаат само зборот на Мицкоски дека е чисто“, наведуваат од СДСМ, додавајќи дека тоа следело по хиперхлорирањето, наодите за бактерии, забраната за користење и прогласувањето на водата за техничка.

Во однос на угинувањето на рибата во Треска, од СДСМ бараат итни анализи и ги поставуваат истите прашања што, според нив, се поставувале и за Гостивар, Лепенец и Вардар – каде се резултатите од испитувањата.

— реклама —

Партијата го критикува и градоначалникот на Скопје, Орце Ѓорѓиевски, тврдејќи дека тој ја проверувал состојбата со водата од воздух, но дека резултати од тоа нема.

СДСМ обвинува дека извештаите за квалитетот на водата во повеќе од 50 места во Македонија не се достапни за јавноста и директно ги посочува премиерот Христијан Мицкоски и министерот за здравство Сашо Клековски како одговорни за нивното необјавување.

— реклама —

„Зошто се кријат извештаите?“, прашуваат од СДСМ, оценувајќи дека доколку граѓаните ги видат резултатите, ќе се урнат, како што велат, тврдењата на власта дека „нема криминал“ и дека „се живее подобро“.

Во соопштението партијата повторно го отвора и прашањето за концертот на Дејвид Гета, тврдејќи дека за настанот биле потрошени 5,53 милиони евра од Државната лотарија. Од СДСМ велат дека граѓаните нема да заборават на прашањата поврзани со водата.

— реклама —

СДСМ бара целосни извештаи за Гостивар, Треска, Лепенец, Вардар и за сите места каде што, според партијата, постојат сомнежи или прашања околу квалитетот на водата.

„Без потпис на лабораторија нема чиста вода“, порачуваат од СДСМ.