(Видео) Трајчулески: СДСМ поднесе интерпелација за Стоилковиќ: Одговорност на извршителот на Вучиќ и неговите агенди во Владата на Мицкоски

СДСМ поднесе интерпелација за министерот за локална самоуправа Иван Стоилковиќ, со која бара утврдување на неговата политичка одговорност. Пратеникот на СДСМ, Митко Трајчулески, на прес-конференција ги образложи причините за иницијативата, обвинувајќи го министерот за однесување спротивно на државните интереси и за нарушување на достоинството на Собранието.

— реклама —

Според Трајчулески, интерпелацијата се однесува на јавните настапи и политичките активности на Стоилковиќ, неговите наводни врски со српски разузнавачки структури, како и дејствувањето поврзано со руските и кинеските политички агенди. Тој го отвори и прашањето за патувањето на министерот во Кина и неговото настапување со делегацијата на Српската напредна партија и претседателот Александар Вучиќ.

Од СДСМ реагираат и на содржини во кои, според нив, се велича Ратко Младиќ, осуден за геноцид. Трајчулески посочи дека интерпелацијата го опфаќа и ова прашање, повикувајќи се на одредби од Кривичниот законик што се однесуваат на одобрување или оправдување геноцид, злосторства против човечноста и воени злосторства.

— реклама —

Како дополнителна причина за барањето, пратеникот ги наведе навредите, пцуењето и заканите кон пратениците на СДСМ во Собранието, меѓу кои и кон Фатмир Битиќи, Арбана Пашоли и него лично. Според него, Стоилковиќ не презел одговорност ниту упатил лично извинување за таквото однесување.

— реклама —

Трајчулески оцени дека министер во земја членка на НАТО мора да ги почитува стратешките определби и надворешната политика на државата, усогласена со Европската Унија. Тој ја посочи одговорноста на премиерот Христијан Мицкоски, кој, според СДСМ, го поставил и продолжува политички да го штити Стоилковиќ.

Од партијата порачуваат дека со интерпелацијата бараат јасен став од парламентарното мнозинство дали ќе застане зад достоинството на Собранието и државните интереси или ќе го поддржи министерот.

— реклама —