„Арамијата е готов, Мицкоски нема пари во буџетот - моли за алиби за избори“, велат од СДСМ

Опозицискиот СДСМ преку соопштение ја обвини власта предводена од Христијан Мицкоски за лошо управување со јавните финансии, економски неуспеси и обиди да се создаде политичко оправдување за распишување предвремени парламентарни избори. Од партијата тврдат дека во буџетот недостигаат значителни средства и дека власта се соочува со сè поголемо незадоволство.

Во соопштението, СДСМ наведува дека во буџетот недостигаат 900 милиони евра, дека досега биле направени два ребаланса и дека до крајот на годината е најавен и трет. Партијата тврди и дека недостигаат една милијарда евра за пензиите, додека ја обвинува Владата дека за две години се задолжила за четири милијарди евра.

— реклама —

Од СДСМ велат дека нема зголемување на минималната плата на 600 евра, дека не е обезбедена помош за земјоделците и младите, како и дека не бил прифатен предлогот за законско зголемување на минималната плата. Воедно, опозицијата ја критикува власта поради најавите за ангажирање 100.000 странски работници, посочувајќи дека претходно биле споменувани 50.000.

— реклама —

Од партијата упатија критики и за, како што наведуваат, дипломатските скандали, економските политики и проектите што се доделуваат на приватни компании. Во соопштението се споменуваат и рударските проекти, центрите за податоци и наводните планови за увоз на странска работна сила.

СДСМ ја обвини власта и за мешање во правосудството, повикувајќи се на извештаи на Европската комисија. Критики упати и кон министерот за внатрешни работи Панче Тошковски, особено во однос на безбедноста на границите, како и кон институциите поради недостигот на извештаи за исправноста на водата на повеќе локации во државата. Како пример го посочи Гостивар, за кој тврди дека речиси четири месеци нема извештај за квалитетот на водата.

— реклама —

Во политичкиот дел од соопштението, СДСМ тврди дека ВМРО-ДПМНЕ губи поддршка и се повикува на анкета за која наведува дека била спроведена од агенција платена со 400.000 евра од јавни средства. Според интерпретацијата на опозициската партија, резултатите покажувале пад на поддршката за ВМРО-ДПМНЕ за повеќе од 40 проценти во споредба со претходните избори.

СДСМ смета дека власта бара политичко оправдување за предвремени избори и дека за таа цел би можела да отвори нов конфликт или да создаде нова патриотска тема. Партијата најавува дека нема да учествува во такво сценарио и дека нема да биде алиби за, како што ја нарекува, криминална организација.

„Од СДСМ нема да добие. Нема да бидеме алиби за криминална организација“, порачуваат од партијата, додавајќи дека власта, според нив, ќе мора да одговара пред независно судство.