Поранешниот вицепремиер задолжен за добро владеење, Арбен Фетаи, е назначен за специјален пратеник за Европската Унија во Брисел. Одлуката ја донела Владата на вчерашната седница, нешто повеќе од еден месец откако Собранието го разреши од функцијата.
Фетаи на 1 јуни поднесе оставка, по што на 10 јуни официјално беше разрешен од Собранието. Во меѓувреме, на 4 јуни, еден од лидерите на коалицијата „Вреди“, Изет Меџити, најави дека тој ќе биде ангажиран како специјален претставник на Владата во Постојаната мисија на Македонија при Европската Унија во Брисел.
Новата функција Фетаи ја потврди преку објава на Фејсбук, оценувајќи дека станува збор за нов предизвик и важна одговорност.
„Владата на Република Македонија ме именуваше за специјален пратеник за Европската Унија во Брисел. Ова претставува ново поглавје во мојата посветеност на европската интеграција на државата“, напиша тој.
Според Фетаи, неговите обврски ќе бидат насочени кон зајакнување на политичката поддршка за македонските евроинтеграции, интензивирање на комуникацијата со институциите на Европската Унија и земјите членки, како и надминување на дипломатските и политичките предизвици на патот кон членството.
Тој нагласи дека долгогодишното професионално искуство во Брисел, како и ангажманот во Владата, ќе ги стави во функција на европската перспектива на Македонија, изразувајќи благодарност до премиерот Христијан Мицкоски и Владата за довербата.
Пред да поднесе оставка, Фетаи беше во фокусот на јавноста бидејќи речиси два месеца не доаѓаше на работа како вицепремиер, што отвори бројни прашања за неговото отсуство и статусот во Владата.
