Москва: „Се надеваме дека ќе победи здравиот разум“
Москва го повикува Кишињев да се воздржи од чекори кои им штетат на билатералните односи.
Ова денеска го изјави портпаролката на руското Министерство за надворешни работи, Марија Захарова, откако Молдавија го забрани емитувањето на руските телевизиски канали.
„На 7 април молдавскиот парламент усвои амандмани на кодексот за аудио и визуелни медиумски услуги. Тие предвидуваат забрана за емитување програми и филмови направени во земји кои не ја ратификувале Европската конвенција за прекугранична телевизија, вклучително и Русија“, рече Захарова.
Според неа, пратениците на 14 април ги усвоиле измените на Законот за прекршоци со кои се изрекуваат парични казни или поправни работи за употреба на симболи на „воена агресија“, како знамиња и обоени ленти, симболи, беџови и други.
Меѓу нив беше и црно-портокаловата двобојна Ѓурѓовска лента, рече Захарова и додаде дека се очекува наскоро претседателот на Молдавија да ги потпише тие амандмани.
„Се надеваме дека ќе победи здравиот разум и дека молдавската страна ќе се воздржи од чекори кои ги нарушуваат односите со Русија“, нагласи таа. Според неа, последните чекори на Молдавија се во спротивност со изјавите на нејзините лидери за нивната посветеност на неутралниот статус на земјата и партнерството со Русија.
