Започнува фестивалот „Нови простори 2022“
![](https://skopje1.mk/wp-content/uploads/2022/06/Фестивал-Нови-простори-1.jpg)
Поетско читање, танц, музика и ликовно творење ќе понуди фестивалот „Нови простори 2022“ што во текот на утрешниот ден (18.06.2022 година) од 09:30 до 21 часот ќе се одржува на кејот на реката Вардар.
Програмата на фестивалот оваа година е поделена на два дела и на две локации – првиот дел е на шеталиштето до влезот на бродот Синегалија, од страната на ГТЦ и таму ќе бидат сегментите Отворање, „Нови поетски пространства“, „Танц на кеј“, „Светски поетски момент“ и „Сликаме на кеј“, а вториот дел ќе ги опфати концертот со сегментите „Нов бит“ и „Отворен микрофон” што ќе се одржи на скалите под Камени мост, кај сидрото.
Продажната изложба ќе биде поставена утрото, а сликарите ќе работат додека трае целата програма. Идејата е целокупниот настан да биде една голема заедничка уметничка инсталација.
Согласно со програмата, секој учесник ќе биде претставен во време од 6 минути, при што поетите во 2 минути ќе треба да се претстават себе си, а во 4 минути да прочитаат една или две песни. Сликарите ќе имаат можност да ги презентираат своите дела и да раскажат за својот начин на работа, уметничките погледи и ликовната поетика. Во вториот дел се настапите на музичарите, а пред крајот на концертот ќе биде доделена и наградата за публиката.
Доколку врне дожд, настанот ќе се одржи во холот на Градскиот трговски центар – приземје.
Фестивалот се организира со финансиска поддршка од Градот Скопје, во рамките на Програмата за култура за 2022 година.
![](https://skopje1.mk/wp-content/uploads/2022/01/2222.png)