Иран: Подготвени сме, САД се виновни
Иран ја потврдува својата подготвеност да постигне „добар договор“ со светските сили, изјави портпаролот на Министерството за надворешни работи на Иран, Саид Хатибзаде.
Тој, исто така, ги обвини САД за одложување на преговорите за обновување на нуклеарниот пакт од 2015 година. „И денес сме подготвени да се вратиме во Виена за да постигнеме добар договор, под услов официјален Вашингтон да ги исполни своите обврски“, рече Хатибзаде, пренесува Ројтерс.
Во март, обновувањето на иранскиот нуклеарен договор со светските сили се чинеше неизбежен, но разговорите заглавија околу тоа дали Соединетите Држави би можеле да го отстранат корпусот на иранската револуционерна гарда (ИРГЦ), кој ги контролира елитните вооружени и разузнавачки ресурси на Техеран, од неговата листа на терористички организации, што Вашингтон го обвинува за глобална терористичка кампања.
Поранешниот американски претседател Доналд Трамп се повлече од нуклеарниот договор со Иран во 2018 година, поради што Техеран, една година подоцна, повторно почна да ги крши основните нуклеарни ограничувања.
Минатата недела САД соопштија дека чекаат конструктивен одговор од Иран за обновување на договорот, без „дополнителни“ услови, што очигледно се однесува на барањето на Иран да ја отстрани Револуционерната гарда од американската листа на терористички организации.
