Португалија започна со вакцинирање за ковид и грип
Португалија во среда ќе започне да ги вакцинира граѓаните со бустер доза на Ковид-19, заедно со сезонската вакцина за грип, соопштија здравствените власти.
Ќе се користат два вида вакцини против Ковид – Pfizer/Biontech и Moderna.
Вакцините се ажурирани за да се заштитат од нови соеви на корона и беа одобрени од Европската агенција за лекови (ЕМА) во четвртокот.
„За време на сезоната есен-зима, луѓето треба да се заштитат од сериозни облици на ковид и грип. Кампањата за вакцинација ќе започне на 7 септември“, рече шефот на португалската здравствена служба Граса Фреитас.
Таа додаде дека приоритет имаат лицата над 80 години и лицата со одредени здравствени проблеми.
Двете дози на вакцината против Ковид и грип ќе се даваат истовремено, по една на секоја рака, а кампањата за вакцинација ќе трае до 17 декември.
Португалија ја имаше една од најсилните кампањи за вакцинација во светот, па иако во првите месеци од оваа година беше забележан голем пораст на бројот на новозаразени лица поради високо заразниот вид омикрон, сепак смртните случаи и хоспитализирањата останаа далеку под нивоата забележани во претходните бранови на корона.
