Нова закана за Европа: Ќе воведе ли Русија санкции за украинскиот Нафтогас
Ако Москва ја следи својата закана дека ќе го санкционира украинскиот Нафтогас, една од последните рути за снабдување со гас на Русија кон Европа може да биде затворена.
Тоа би ја влошило енергетската криза непосредно пред почетокот на зимската грејна сезона, оценува Ројтерс во денешната анализа.
Нафтогас започна нов арбитражен случај против Гаспром претходно овој месец, тврдејќи дека руската компанија не платила транзитни такси за испраќање на својот гас во Европа преку цевководи што минуваат низ украинска територија.
Гаспром оваа недела ги отфрли сите тврдења, додавајќи дека Русија би можела да воведе санкции за Нафтогас доколку продолжи со правната постапка. Потенцијалните санкции би му забраниле на Гаспром да плаќа украински транзитни такси, што, според аналитичарите, би можело да го прекине протокот на руски гас во Европа низ таа земја.
Јуриј Витренко, главниот извршен директор на Нафтогас, вели дека компанијата ќе продолжи со арбитражната постапка против Гаспром без разлика на се.
„Најлошото сценарио што европските влади го подготвуваа цело лето ќе стане реалност – а тоа е европски пазар без руски гас. Транзитот низ Украина е единствениот пат за испорака на руски гас во Европа што се уште е во употреба, покрај гасоводот Турски тек, кој им служи на земјите од југоисточна Европа“, вели Наташа Филдинг, раководител на одделот за цени на гас во Аргус Медиа за ЕМЕА.
Холандските големопродажни цени на бензинот, кои се репер за Европа, скокнаа во вторникот по заканата на Гаспром со санкции, продолжувајќи го својот раст денеска за дури 13 отсто, а од почетокот на годината пораснаа за околу 120 отсто, наведува британската агенција.
Протокот на гас низ мерната станица Суја, единствената оперативна украинска транзитна рута, моментално изнесува околу 42 милиони кубни метри дневно. Во мај, Киев ја суспендираше рутата преку станицата Сорановка, преку која речиси една третина од гасот од Русија до Европа се доставува преку Украина, наведувајќи ја како причина виша сила.
Поради истекување на гас откриени на гасоводот Северен тек 1 оваа недела, малку е веројатно дека испораките ќе бидат обновени преку трасата, која прво беше намалена на 20 отсто од капацитетот, а потоа целосно беше прекината минатиот месец, а Москва ја наведува потребата од редовно одржување, забележува Ројтерс.
