„Ќе ја ослободиме нашата територија со воени средства“, вели советник на Зеленски
Украина е решена да ја врати територијата што Русија најверојатно ќе ја припои по гласањето, изјави советникот на Зеленски, Михаил Подољак.
Во интервју за агенцијата АП, тој додаде дека сериозно ги сфаќа заканите на Москва за употреба на нуклеарно оружје.
Советникот на претседателот на Украина, Володимир Зеленски, тврди дека ништо нема да се смени на бојното поле доколку, како што се очекува, Русија има намера да анектира четири региони на јужна и источна Украина во наредните денови.
„Ќе ја ослободиме нашата територија со воени средства, што не зависи од тоа што мисли или сака Русија, туку од воените способности на Украина“, рече Подољак.
Тој додаде дека е од витално значење за Украина да ја врати целата нејзина земја што била заземена насилно, и тоа го карактеризира како важно не само за неговата земја, туку и за нејзините европски соседи.
Западните сојузници на Украина ги осудија референдумите организирани од Кремљ како нелегални и измамнички, истакнувајќи дека многу жители остануваат раселени поради седуммесечната војна.
Проруските власти во регионите Доњецк, Керсон, Луганск и Запорожје изјавија дека ќе побараат од рускиот претседател Владимир Путин да ги вклучи тие области во Русија, а анексијата ќе и овозможи на Москва да ги третира украинските региони како официјална руска територија и соодветно да ги брани. .
