Македонскиот народен театар оваа година со претставата „Лагата“ ќе учествува на 31. Фестивал на камерниот театар „Ристо Шишков“.
Претставата е работена според текст на актуелниот француски писател Флоријан Зелер, во режија на Бесфорт Идризи, а играат: Јордан Симонов, Габриела Петрушевска, Оливер Митковски и Драгана Левенска.
„Лагата“ ќе се одигра на 12 септември со почеток во 20 на сцената во театарот „Антон Панов“, Струмица, а во чест на нашиот драг колега, соработник и, пред сè, голем пријател – Крсте С. Џидров. Џиби, како што го нарекувавме во театарскиот свет. Тој од 1984 до 2022 е автор на сценографии за 12 (дванаесет) претстави во МНТ, а токму претставата „Лагата“ е негова последна сценографска креација во овој театар.
Макфакс
