Центарот за деминирање во Босна и Херцеговина во соработка со Министерството за цивилни работи во Босна и Херцеговина, Комисијата за деминирање во Босна и Херцеговина и невладината организација „Норвешка национална помош“ во Сараево го одбележаа завршувањето на процесот на расчистување во Босна и Херцеговина на касетна муниција, пренесе босанската агенција ФЕНА.
Норвешкиот амбасадор во Босна и Херцеговина, Олаф Рајнертсен, истакна дека неговата влада и амбасадата веќе 12 години ја поддржуваат земјата за да се постигне ова и целосно да се елиминира касетната муниција во Босна и Херцеговина.
Контаминацијата на Босна и Херцеговина со касетна муниција што се случи за време на последната војна изнесуваше 14,61 квадратни километри на 140 локации низ земјата, пишува „Ал Џезира“.
Однесе 195 човечки животи во Босна и Херцеговина.
Благодарение на потпишувањето на Конвенцијата за забрана на производство, употреба, складирање и пренос на касетна муниција и нејзината ратификација во 2010 година, Босна и Херцеговина, според последното одобрено продолжување од 2021 година, се обврза да ги исчисти сите преостанати познати области со касетна муниција, која завршува на 1 септември 2023 година.
Земјата сè уште е обврзана да обезбеди поддршка на жртвите на касетната муниција, во нивната рехабилитација и реинтеграција.
makfax.com.mk
