Украинскиот претседател Володимир Зеленски ги праша Обединетите нации (ОН) зошто му дозволиле на рускиот министер за надворешни работи Сергеј Лавров да присуствува на светската организација поради тековната инвазија на Украина, пишува „Скај њуз“.
За време на посетата на болницата во Њујорк каде што се лекуваат украински војници, Зеленски рече дека светските лидери треба да сносат одговорност за таа одлука.
„За нас е многу важно нашите партнери да ги слушнат сите наши зборови и пораки“, рече Зеленски.
Подоцна денеска украинскиот претседател ќе се обрати пред лидерите на Генералното собрание на ОН, а утре на седницата на Советот за безбедност на ОН ќе зборува за војната во Украина. Се очекува Лавров да има забелешки на седницата. Кога Зеленски беше прашан дали ќе остане во просторијата за време на говорот на Лавров, тој рече: „Не знам како ќе биде, навистина“.
