Путин ќе обновува во Украина, објави порака до светот
На првата годишнина од руската анексија на четирите украински региони Херсон, Запорожје, Доњецк и Луганск, рускиот претседател Владимир Путин вети дека ќе ги обнови регионите зафатени од војна.
„Училиштата, болниците, станбените згради и патишта, музеите и спомениците ќе бидат обновени и реконструирани“, рече Путин во видео пораката објавена од Кремљ.
Сите руски региони ќе ја дадат својата „братска помош“ во напорите за обнова, додаде тој. Путин, кршејќи го меѓународното право и по референдумите кои меѓународно беа исмејувани како измама, потпиша договор со окупаторските лидери на четирите региони на 30 септември 2022 година да станат дел од Руската Федерација.
Украина ја продолжува својата контраофанзива со надеж дека ќе ги ослободи териториите од руската окупација.
„Пред нас е голема задача и решение за тешките предизвици, спроведување на голема програма за обнова и социо-економски развој на нашите историски региони“, продолжи Путин во видео пораката.
„И сигурно ќе ги постигнеме поставените цели“, додаде тој.
Рускиот претседател го нарече „историски и судбоносен настан“ анексијата на територијата, која не ја призна ниту една друга земја во светот. Тој им се заблагодари на граѓаните на територијата чија решителност ја направи Русија уште посилна: „Ние сме еден народ. И заедно надминуваме сè, наоѓаме одговори на сите предизвици“.
Дури и по повеќе од една и пол година војна, Русија не контролира целосно ниту еден од четирите анектирани региони. Украина успеа да врати некои окупирани делови од територијата за време на повеќемесечните борби.
