Тажната вест пристигна од Нови Сад. На 78-годишна возраст почина Јанко Луковски, легендарен македонски кошаркар и познат тренер во поранешна Југославија, особено во Македонија и Србија.
Луковски потекнува од кошаркарската школа на Работнички во Скопје, каде прво со голем успех играше заедно со својот брат Митко, а потоа стана одличен тренер во својот матичен клуб.
Познатиот тим од скопски Градски парк со стратегот Луковски ги оствари двата најголеми успеси во историјата на клубот во поранешна СФРЈ, во сезоната 1991/92 го освои третото место во националното првенство, кое и тогаш важеше за едно од најсилните во Европа. Неполни десет години пред тоа го предводеше Работнички до финалето на Купот на Југославија (1983 година), во кое беа поразени од Цибона.
Од 1982 до 1986 година ја водеше, понекогаш самостојно, а повремено и како помошник на Русмир Халиловиќ, јуниорската, кадетската и младинската репрезентација на Југославија, во која тренираше асови како Дражен Петровиќ, Јуре Здовац, Жарко Паспаљ, Миодраг Пецарски, Данко Цвјетичанин, Велимир Перасовиќ, Зоран Сретеновиќ…
Пред две децении тој ја основа познатата кошаркарска школа „Спорт Ки“ во Нови Сад.
Пред неколку години ја имаше својата последна функција во македонската кошарка, како советник за помлади категории во Македонската кошаркарска асоцијација и во младинската школа МЗТ Скопје.
Макфакс
