Војската на Кина објави дека американски воен брод илегално навлегол во територијалните води на островите во Јужното кинеско море, истакнувајќи дека е во „висока готовност“.
„САД сериозно го поткопаа регионалниот мир и стабилност“, рече портпаролот на јужниот воен округ на Кина во изјавата, додавајќи дека Вашингтон намерно ја поттикнува тензијата во Јужното кинеско море и го поткопува суверенитетот на Кина.
Според кинеската војска, американски воен брод навлегол во областа на островите Спратли, приближувајќи се до атолот за кој право полагаат Кина и Филипините.
Кинеската народна ослободителна армија организира поморски единици за придружба и набљудување на американскиот брод, рече портпаролот, истакнувајќи дека кинеската војска е „во состојба на висока готовност, подготвена решително да го брани националниот суверенитет“.
Американската морнарица соопшти дека воениот брод Габриел Гифордс рутински спроведува операции во меѓународните води во Јужното кинеско море, во согласност со меѓународното право.
„Американската седма флота спроведува операции во Јужното кинеско море секој ден, како и со децении“, се вели во соопштението. „Овие операции покажуваат дека сме подготвени да поддржиме слободен и отворен индо-пацифички регион“.
Во последните месеци, Кина веќе протестираше против патролирањето на американските воени бродови во Јужното кинеско море, а кинеските бродови неколкупати се судрија со филипинските бродови, забележува Ројтерс.
Во неделата, филипинската крајбрежна стража испрати два брода во Јужното кинеско море, велејќи дека забележала „загрижувачка“ групација на кинески воени бродови во близина на спорниот архипелаг.
