Израелските војници денеска водеа жестоки битки против палестинската исламистичка група Хамас во јужниот дел на Газа, откако стигнаа до центарот на градот Кан Јунис, принудувајќи ги палестинските цивили да бараат засолниште на друго место, бидејќи бројот на безбедни области се намалува. Израелски воени авиони бомбардираа цели низ густо населената крајбрежна енклава за време на една од најинтензивните фази на конфликтот во изминатите два месеци откако Израел започна воена кампања за уништување на Хамас.
Палестинските болничари изјавија дека болниците се преполни со мртви и ранети, од кои многу жени и деца, и дека остануваат без залихи. Стотици илјади луѓе протерани од северот бараат засолниште во сè помалиот број места на југот, кои Израел ги прогласи за безбедни.
Високиот комесар за човекови права на Обединетите нации Волкер Турк изјави во Женева дека ситуацијата е „апокалиптична“ и дека постои ризик двете страни да ги прекршат човековите права. ОН соопштија дека е невозможно да се достави хуманитарна помош преку граничниот премин Рафах од Египет.
Откако го зазедоа северниот дел на Газа, израелските војници и тенкови почнаа да напредуваат кон југ, каде што го опколија Кан Јунис по седумдневниот прекин на огнот кој заврши минатата недела. Израел тврди дека неговите сили погодиле стотици цели, вклучително и милитантна ќелија во близина на училиште на север. Вооруженото крило на Хамас, бригадите Изадин ал Касам, соопштија дека борбите биле жестоки.
Жителите рекоа дека израелските бомбардирања се засилиле во текот на ноќта, при што загинале и биле ранети цивили, како и дека тенковите се судираат со палестинските милитанти северно и источно од Кан Јунис.
Тенковите биле распоредени на работ на бегалскиот камп Кан Јунис, недалеку од домот на највисокиот функционер на Хамас во Газа, Јахја Синвар, велат жителите и медиумите на Хамас, но не е јасно дали има некој внатре. Израел ја започна својата воена кампања како одговор на нападот на 7 октомври, во кој борците на Хамас упаднаа во јужен Израел, убивајќи 1.200 луѓе и зедоа 240 заложници, според Тел Авив.
Канцеларијата за медиуми на Хамас во вторникот соопшти дека оттогаш во Газа биле убиени најмалку 16.248 луѓе, вклучувајќи 7.112 деца и 4.885 жени. Израел тврди дека 84 негови војници биле убиени од почетокот на копнената операција пред пет недели.
Неколкуте болници кои остануваат отворени во Газа едвај функционираат. Волкер Турк за новинарите изјави дека неговите колеги ја опишале ситуацијата во енклавата како апокалиптична. „Под овие околности, ризикот од злосторства против човештвото е зголемен“, рече тој.
Израелскиот офицер Моше Тетро рече дека армијата однапред им кажува на цивилите да ги напуштат областите на Кан Јунис каде што има намера да дејствува, користејќи телефонски пораки, онлајн соопштенија и летоци. Израелската војска соопшти дека Хамас ги користи цивилите како жив штит и ги спречува да се преселат на безбедни места, што милитантната група го негира.
Жителите на Газа велат дека нема безбедно место бидејќи преостанатите градови и засолништа се преполни, а Израел ги бомбардира областите во кои испраќа луѓе. Соединетите држави, најблискиот сојузник на Израел, го повикаа Тел Авив да направи повеќе за да внесе гориво и друга хуманитарна помош во Газа и да ги минимизира цивилните жртви.
