Војната на Израел против Хамас во Газа ќе трае „повеќе од неколку месеци“, изјави министерот за одбрана Јоав Галант пред високи американски претставници во Тел Авив.
„Тие изградија подземна и надземна инфраструктура и не е лесно да се уништи“, рече Галант за време на разговорот со американскиот советник за национална безбедност Џејк Саливан.
„Ќе биде потребно време – ќе потрае повеќе од неколку месеци, но ние ќе победиме“, рече Галант.
Тој им се заблагодари на САД за континуираната помош за Израел и напорите за ослободување на заложниците киднапирани од Хамас во нападот врз Израел на 7 октомври.
По средбата, Саливан се сретна со израелскиот премиер Бенјамин Нетанјаху и со други членови на воената влада.
САД разговараа со израелското раководство за можна транзиција кон воени операции со помал интензитет во Газа, објави Белата куќа.
Американскиот претседател Џо Бајден рече дека сака Израел да се фокусира на тоа како да спаси цивилни животи во Газа.
„Сакам да бидат фокусирани на тоа како да спасат цивилни животи, да не ги запираат нападите против Хамас, туку да бидат повнимателни“, рече Бајден.
На прашањето за времетраењето на војната, Кирби рече дека САД не им диктираат на Израелците колку долго треба да трае војната.
Во четвртокот, Израел продолжи да го гаѓа појасот Газа и покрај интензивните меѓународни повици за заштита на цивилите и ширење на смртоносни болести меѓу раселените жители.
Во нападите израелската армија убила најмалку 18.600 луѓе, а ранила 50.000, тврди Министерството за здравство во Газа.
