Дописникот на „Телеграф“ ја објави првата анализа за повлекувањето на САД
Ви ја пренесуваме во целост:
„И тоа е тоа – САД преминуваат на пристап „рацете подалеку“ кога во прашање е завршување на војната во Украина.
Преговарачите повеќе нема да летаат низ светот при првиот знак на потреба да се обидат да посредуваат во договор меѓу двете завојувани страни.
Знаците дека Доналд Трамп се заморил од својата улога на миротворец се видливи со денови, бидејќи времето што го вети дека ќе го заврши конфликтот минува незапирливо.
Тој ги вклучи своите најдобри луѓе во тоа во текот на првите 100 дена, изјави државниот секретар Марко Рубио минатата недела. Но, сега, додаде тој, мора да се фокусира на други приоритети.
Всушност, ова е признание дека Русија не соработува. Украина веднаш го прифати предлогот на САД за 30-дневен прекин на огнот. Москва тапка во место.
Трамп ги изрази своите сомнежи минатата недела – прашувајќи се дали Владимир Путин се меша во овие разговори. По таа позната, речиси интимна средба со Володимир Зеленски во Ватикан, тој стана поблаг кон Украина.
Со договорот за минерали се признава дека Русија започнала целосна инвазија.
Со повлекувањето од мировниот процес, претседателот го остава Кремљ во мала неволја. Според разузнавачките извори на CNN, Путин сега е фокусиран на зацврстување на позицијата на Русија на бојното поле, додека нејзината економија продолжува да се распаѓа.
Дали ова значи дека Трамп се повлекува и од идејата за големо економско партнерство со Русија што го вети доколку се постигне договор? Тоа е една од главните цели на Путин – тој нема да сака да ја пропушти можноста.
Дали рускиот диктатор ќе стане посериозен ако САД повторно заземат постуден став? Некои во Белата куќа се надеваат токму на тоа.
Но, исто така е можно Путин едноставно да продолжи како и досега – да ја измачува Украина, да ги пополнува редовите на својата армија и да чека Западот да престане да го вооружува неговиот непријател.
