Шпанскиот тенисер Карлос Алкараз се пласираше во финалето на Мастерсот во Синсинати, совладувајќи го Германецот Александер Зверев во полуфиналето со 6:4, 6:3.
Младиот Шпанец по час и 45 минути игра обезбеди нов голем дуел со својот најголем ривал и актуелен број еден на АТП-листата, Јаник Синер.
Првиот сет беше решен во седмиот гем, кога Алкараз ја искористи втората брејк топка и стекнатата предност ја одржа до крајот на сетот.
Во вториот сет се виде кратка размена на брејкови – Алкараз прв му го одзеде сервисот на Зверев, но Германецот веднаш возврати. Сепак, завршницата целосно му припадна на Алкараз, кој уште двапати му го одзеде сервисот на противникот и рутински го приведе мечот до крај.
Со оваа победа, Алкараз избори ново финале на Мастерс турнир, каде што ќе се соочи со Синер (понеделник, 21:00 часот). Италијанецот во второто полуфинале беше подобар од француското изненадување на турнирот, Теренс Атман – 136. играч на светот, со 7:6 (4), 6:2.
