(Видео) Трагедија во САД: Пет загинати и десетици повредени во превртен автобус со туристи кај Нијагарините водопади

Пет лица загинаа, а десетици беа повредени во несреќа што се случи вчера кога туристички автобус со околу 55 патници се преврте на автопат во близина на Бафало, во северниот дел на американската држава Њујорк, недалеку од канадската граница.

— реклама —

— реклама —

Според државната полиција, најголем дел од патниците биле со индиско, филипинско и кинеско потекло. Во автобусот имало и деца, но меѓу загинатите нема малолетни лица.

Полицискиот портпарол Џејмс О’Калаган изјави дека автобусот се враќал од Нијагарините водопади кон Њујорк, кога возачот изгубил контрола, најверојатно поради невнимание. Исклучена е можноста за механички дефект или возење под дејство на алкохол.

— реклама —

Според медицинските служби, ниту еден од повредените веќе не е во животна опасност. Дваесетина возрасни лица се пренесени во болници, а за транспортот беа ангажирани осум хеликоптери.

— реклама —

Кинеската државна телевизија CCTV потврди дека меѓу патниците имало шест кинески државјани – петмина се полесно повредени, а еден морал да биде опериран.

Преведувачи беа испратени на лице место за да им помогнат на странските туристи.