Никој од надлежните институции и организации не се осмелува да каже точно кога ќе заврши пандемијата на коронавирусот, иако во моментов тоа е една од најбараните информации во светот.
Сепак, Бил Гејтс, основачот на „Мајкрософт“ и технолошки могул, има свое предвидување. Тој смета дека луѓето низ светот ќе го дочекаат крајот на пандемијата во различни периоди, во зависност од тоа дали живеат во земји во развој или побогати земји како САД.
„Иновациите за подобрување на дијагностиката, новите терапии и вакцините се навистина импресивни“, рече Гејтс за списанието „Вајрд“ во интервју објавено во петокот.
„Поради тоа, мислам дека пандемијата во голема мерка, особено кај богатите земји, би можела да заврши уште кон крајот на 2021 година. Во светот во целина, тој рок би бил продолжен до крајот на 2022 година“, рече Гејтс.
„Оваа болест, според првичните податоци од тестирањата на вакцини врз животни и податоците од тестирањата во прва фаза, се чини дека е многу излечива по пат на вакцинација“, истакнува Гејтс.
