Европските аеродроми и авиокомпании побараа од Европската комисија привремено да го суспендира новиот Систем за влез/излез (EES), предупредувајќи дека тој предизвикува сериозни проблеми во воздушниот сообраќај во пресрет на летната туристичка сезона.
Во отворено писмо до претседателката на Европската комисија, Урсула фон дер Лајен, претставниците на авијацискиот сектор предупредуваат дека патниците се задржуваат во долги редици на надворешните шенгенски граници, поради што голем број ги пропуштаат своите летови, а авионите полетуваат со празни седишта.
Според нив, во периодите на најголем метеж времето на чекање достигнува и до пет часа. Тие предупредуваат дека состојбата би можела дополнително да се влоши во јули и август, кога низ европските аеродроми ќе поминат десетици милиони патници.
„Патниците веќе се принудени да чекаат во ред подолг период пред терминалните згради и на отворени платформи. Некои летови заминуваат половина полни поради доцнења при качувањето“, се наведува во заедничкото писмо.
Барањето е потпишано од трите најголеми организации во европската авиоиндустрија – Здружението на европски аеродроми (ACI Europe), „Airlines for Europe“ (A4E) и Меѓународното здружение за воздушен транспорт (IATA).
Иако ја поддржуваат целта на системот за подобра безбедност и контрола на границите, тие предлагаат земјите членки привремено да можат да се вратат на досегашната практика со печати во пасошите за време на најголемите сезонски оптоварувања.
Дополнително, авиоиндустријата бара до септември да се воспостави постојан кризен механизам што ќе овозможи привремено суспендирање на EES во исклучителни околности, сè додека сите земји не ја обезбедат потребната инфраструктура за негово непречено функционирање.
