Новиот дигитален систем за гранична контрола на Европската Унија создава сериозни проблеми на голем број европски аеродроми, предупреди шефот на европскиот оддел на Меѓународниот совет на аеродроми (АЦИ), Штефан Шулте.
Станува збор за Системот за влез и излез (ЕЕС), кој почна да се применува во април годинава и предвидува патниците кои не се државјани на Европската Унија при влез во Шенген зоната да остават биометриски податоци, односно фотографија и отпечатоци од прсти.
Иако системот функционира без поголеми проблеми во дел од земјите, на бројни аеродроми веќе предизвикува долги редици, значителни доцнења и дури пропуштање на летови.
„Политичарите треба да престанат да се преправаат дека ЕЕС функционира совршено. Тоа не е така. Патниците чекаат со часови во редици во периодите на најголем сообраќај и не знам како ќе се справиме во наредните недели, кога се очекува дополнително зголемување на бројот на патници“, изјави Шулте.
Според него, неопходно е граничните служби да добијат поголема флексибилност и можност привремено да го суспендираат системот кога тоа е потребно, со цел да се избегне дополнителен хаос.
„Итно ни е потребна можност ЕЕС да биде привремено суспендиран кога околностите го наложуваат тоа, како и преиспитување на сегашните процедури. Станува збор за почит кон патниците кои избрале да патуваат во Европската Унија и за зачувување на угледот на Европа како добредојдена и ефикасна дестинација“, порача Шулте.
Европската комисија, во одредени околности, дозволува привремено суспендирање на системот ЕЕС најдоцна до септември годинава.
