Австралискиот премиер во обраќање до нацијата: Следуваат тешки месеци

Австралискиот премиер Ентони Албанезе предупреди дека земјата се соочува со тежок период поради енергетската криза предизвикана од конфликтот на Блискиот Исток, нагласувајќи дека последиците ќе се чувствуваат во наредните месеци.

Во обраќање до нацијата, тој посочи дека ниту една влада не може целосно да ги елиминира економските притисоци што произлегуваат од војната.

— реклама —

„Месеците пред нас можеби нема да бидат лесни. Сакам тоа да го кажам отворено. Ниедна влада не може да ветува дека ќе ги отстрани притисоците што овој конфликт ги предизвикува“, изјави Албанезе.

— реклама —

Тој нагласи дека владата ќе преземе мерки за ублажување на последиците врз граѓаните и економијата.

„Можам да ветам дека ќе направиме сè што можеме за да ја заштитиме Австралија од најтешките последици“, изјави Албанезе.

Премиерот упати и директен апел до граѓаните да не создаваат паника и да не прават непотребни резерви на гориво.

— реклама —

„Ако одите на пат, не земајте повеќе гориво отколку што ви е потребно – точете како и обично. Мислете на другите во вашата заедница, особено во руралните подрачја и во клучните сектори“, изјави Албанезе.

— реклама —

Тој ги повика граѓаните, каде што е можно, да користат јавен превоз наместо лични возила, со цел да се намали притисокот врз снабдувањето со гориво во услови на глобална неизвесност.