„Авто Атом“ престана со работа: Кочани остана без единствениот меѓуградски превозник

По 24 години работа, „Авто Атом“ од Кочани престана со работа, со што градот остана без единствениот превозник што обезбедуваше редовни локални и меѓуградски автобуски линии.

20 септември беше последниот работен ден за компанијата и за нејзините вработени. Според информациите, дел од вработените продолжиле кај други превозници, додека останатите биле прогласени за технолошки вишок.

— реклама —

Последниот автобус на „Авто Атом“ попладнево сообраќаше на линијата Скопје–Кочани, со поаѓање во 18:30 часот од Скопската автобуска станица. Со работа престана и туристичката агенција на компанијата, како и Автобуската станица во Кочани.

Со тоа и официјално заврши работата на компанијата, која го носеше името на поранешното автотранспортно претпријатие „АТОМ“.

— реклама —

„Авто Атом“ во изминатите години се соочуваше со сериозни предизвици во работењето. Пандемијата со коронавирусот остави значителни последици врз јавниот превоз, а дополнителен притисок претставуваше и конкуренцијата од легални и нелегални превозници, кои преземаа дел од патниците на линиите кон Штип и Скопје.

— реклама —

По пандемијата, дел од линиите беа намалени, додека возниот парк со години не беше обновуван. Намалувањето на бројот на жители во источниот дел од државата поради иселувањето, зголеменото користење на лични автомобили и променетите навики на патниците дополнително придонесоа за намалување на побарувачката за автобуски превоз.

Пред неколку месеци компанијата беше понудена и на продажба, но засега нема официјални информации дали е пронајден купувач.

Престанокот на работата на „Авто Атом“ претставува значаен удар за Кочани и околните населени места, особено за повозрасните граѓани кои зависат од редовниот автобуски превоз до Штип, Скопје и другите градови во државата.

По повеќе од две децении, од кочанската автобуска станица заминува превозникот кој беше дел од секојдневието на генерации граѓани и препознатлив кочански бренд на патиштата низ Македонија и странство.