Најмалку 20 лица се повредени во тешка сообраќајна несреќа што рано утрово се случила во Холандија, откако автобус со повеќе од 50 патници, меѓу кои главно ученици од Германија, се судрил со доставно комбе и се превртел.
Несреќата се случила на автопатот А28 во близина на Везеп. Според првичните информации од локалните власти, автобусот удрил во комбето одзади, по што возачот изгубил контрола, излетал од автопатот и автобусот завршил превртен на својата страна.
Во автобусот имало повеќе од 50 лица, а најголем дел од патниците биле тинејџери, ученици од Германија.
Осум лица биле пренесени во болница, меѓу кои и возачот на доставното комбе. Полицијата соопшти дека дел од повредените се во тешка состојба. Други патници со полесни повреди биле прегледани на самото место.
Според информациите објавени од холандските медиуми, пожарникарите морале да интервенираат за да ги извлечат учениците од превртениот автобус. Дел од нив биле извлечени преку покривот на возилото.
Најголем дел од повредените, според досегашните информации, се здобиле со исеченици од скршено стакло.
Поради несреќата, автопатот А28 е затворен во двата правци, а надлежните служби работат на расчистување на местото и утврдување на причините за несреќата.
