Холандија бележи појава на вирусот на Западен Нил кај девет лица од почетокот на летото, а едно лице починало како последица на инфекцијата, соопшти Националниот институт за јавно здравје и животна средина (RIVM).
Заболените биле заразени по убод од комарец кој го носел вирусот. Случаи се регистрирани во провинциите Утрехт, Северен Брабант, Северна Холандија и Јужна Холандија, пренесува „NL Тајмс“.
Едно лице починало од последиците на инфекцијата, додека најмалку едно било хоспитализирано кон крајот на август, според претходните информации од надлежната служба.
Појавата на вирусот претставува значителна промена во однос на минатата година, кога во Холандија не бил регистриран ниту еден случај на заболување кај луѓе.
Од RIVM наведуваат дека кај околу едно од пет заразени лица се појавуваат благи симптоми слични на грип. Кај околу еден процент од заразените, инфекцијата може да предизвика тешки симптоми.
Вирусот на Западен Нил најчесто се пренесува преку убод од заразени комарци. Повеќето заразени лица немаат симптоми или развиваат лесна форма на заболувањето, но кај мал дел може да дојде до сериозни невролошки компликации.
