Сообраќајна несреќа се случила вчера попладне во Анкаран, во близина на Копер, кога 79-годишен возач со автомобилот излетал од патот и завршил во дневната соба на стан во приземје.
Во возилото со него бил и 78-годишен сопатник. Двајцата биле повредени и пренесени во болницата во Изола.
Според словенечката полиција, несреќата се случила кратко пред 17 часот. Возачот се движел од Хрватин кон Анкаран, но по свртувањето надесно, од засега непознати причини, продолжил право. Преминал преку тревната површина и пристапниот пат, по што удрил во станбена зграда на улицата „Регентова“.
Автомобилот пробил дел од фасадата и дрвената конструкција на приземниот стан и со предниот дел завршил во дневната соба.
По ударот, возачот и сопатникот останале заробени во возилото, од каде што ги извлекле пожарникари од Противпожарната бригада на Копер.
На возачот му било наредено да се подложи на лекарски преглед, додека полицијата продолжува да ги утврдува причините поради кои не го следел свиокот. Се проверува и дали во случајот има елементи на кривично дело.
