Во текот на летото ќе започне изградбата на автопатот Скопје-Блаце, откако е завршена постапката за избор на изведувач на проектот, соопшти вицепремиерот и министер за транспорт Александар Николоски.
Според него, Европската банка за обнова и развој (ЕБОР) го информирала Министерството дека за изградбата е избран конзорциум предводен од домашната градежна компанија „Гранит“.
„После подолг временски период една домашна македонска компанија ќе гради голем инфраструктурен проект. Сметам дека е голем сигнал за целиот градежен сектор во Македонија и за целата држава дека можеме да градиме големи инфраструктурни проекти“, изјави Николоски.
Тој посочи дека станува збор за исклучително комплексен проект кој предвидува изградба на пет тунели, две галерии, 12 мостови и вкупно околу 40 инфраструктурни објекти.
„Тоа е голем инженерски и градителски потфат, но ќе докажеме дека како држава можеме да реализираме вакви проекти“, рече Николоски.
Според најавите, автопатот треба да биде завршен во рок од три и пол години.
„Планираме изведувачот да го заврши проектот во рок од 3,5 години и најдоцна за толку време да имаме автопатско поврзување од Скопје до Блаце, односно од Македонија до Косово и Црна Гора“, додаде министерот.
Тој оцени дека Коридорот 6 е од особено значење за државата бидејќи ја поврзува Македонија со Косово и Црна Гора, а преку пристаништето Бар отвора дополнителни можности за македонското стопанство и бизнис заедницата.
Николоски им се заблагодари на ЕБОР за поддршката, како и на премиерот Христијан Мицкоски и Министерството за финансии за обезбедувањето на финансиската конструкција за проектот.
Автопатот Скопје-Блаце е еден од клучните инфраструктурни проекти на Коридорот 6 и треба да го подобри патното поврзување меѓу Македонија и Косово.
