Утрово нема поголеми проблеми во одвивањето на сообраќајот на државната патна мрежа, но возачите треба да бидат внимателни поради влажни коловози на одредени места и можноста за одрони на повеќе делници, информира Авто-мото сојузот на Македонија (АМСМ).
Сообраќајот е со зголемен интензитет на патиштата надвор од градските подрачја. На граничните премини од македонска страна, засега нема подолги задржувања ниту при влез ниту при излез од земјава.
Од АМСМ апелираат возачите да ја приспособат брзината според условите на патот, да ја следат поставената сообраќајна сигнализација и да управуваат со зголемено внимание.
Ризик од одрони има особено на патните правци што минуваат низ котлини, речни долини и клисури. Возачите треба да бидат особено внимателни на делниците Катланово–Велес, Маврово–Дебар–Струга, Виница–Берово и Кочани–Делчево.
