Српски државјанин апелираше до возачите да бидат особено внимателни додека се движат по автопатот низ Македонија, откако, како што тврди, налетал на карпа на коловозот.
Според него, инцидентот се случил по втората наплатна рампа, во правец од Грција.
„Возачи, претпазливо. Пред десетина минути, по втората патарина во Македонија, од правец на Грција, налетав на карпа на автопатот. За среќа, оштетена ми е само заштитната пластика на шасијата и продолжив понатаму“, напиша тој.
Додава дека на следната наплатна рампа му било кажано дека и други возачи веќе го пријавиле проблемот и дека надлежните служби биле известени.
„Ми рекоа дека луѓето веќе пријавувале, дека се запознаени со проблемот и дека екипите се на терен“, наведува тој.
Неколку километри подоцна, како што тврди, забележал и големо куче кое се движело покрај автопатот.
„По неколку километри наидов на огромно куче кое се шета покрај автопатот. Што е ова, можно ли е…?“, наведува тој.
