Убиство во Хрватска: 19-годишен доставувач застрелан додека носел храна

Во Дрниш, Хрватска синоќа е убиено 19-годишно момче, а полицијата интензивно трага по осомничен 50-годишен маж кој по пукањето избегал.Според соопштението на полицијата, убиството се случило околу 23:05 часот на тераса од семејна куќа. Осомничениот К.А. со огнено оружје пукал кон 19-годишниот хрватски државјанин, кој починал на местото од здобиените повреди.Според хрватските медиуми, младиот човек работел како доставувач на храна и токму ја доставил нарачката до осомничениот, по што бил застрелан под сè уште неразјаснети околности.Полицијата соопшти дека осомничениот и претходно ѝ бил познат на полицијата. Во 2023 година против него била поднесена кривична пријава за недозволено поседување оружје и експлозивни материи.Хрватските медиуми објавија и дека тој претходно бил осуден за убиство извршено во 90-тите години, за кое добил 12 години затвор и задолжително психијатриско лекување.Потрагата по осомничениот продолжува, а полицијата ги утврдува сите околности поврзани со убиството.

Свет | пред 4 дена

Најстудено утрово на Попова Шапка и во Берово, измерени 2 степени

Најстудено утрово во Македонија било на Попова Шапка и во Берово, каде се измерени само 2 степени.Според податоците на Управата за хидрометеоролошки работи, 3 степени биле измерени во Лазарополе и Маврови Анови, додека 4 степени имало во Крушево и Претор.Најмногу дожд во изминатите 24 часа наврнало во Берово – 19 литри на метар квадратен. По него следуваат Маврови Анови, Струмица и Куманово со по 12 литри на метар квадратен.Времето денеска ќе биде променливо облачно и посвежо со сончеви периоди. Во крајните западни и источни делови ќе има услови за повремен локален дожд. Ќе дува умерен до засилен ветер од западен и северозападен правец, кој на места ќе надминува 60 километри на час.Дневната температура ќе се движи од 14 до 23 степени.Во Скопје времето ќе биде променливо облачно со сончеви периоди и засилен северозападен ветер во одделни делови од котлината, а максималната температура ќе достигне до 20 степени.

Македонија | пред 4 дена

(Видео) Голем украински напад со дронови врз Москва, најмалку тројца загинати

Најмалку три лица загинаа, а 12 се повредени во голем украински напад со дронови врз Москва и околината, соопштија руските власти.Според градоначалникот на Москва, Сергеј Собјанин, во изминатите 24 часа биле соборени повеќе од 120 дронови, а во нападот не била оштетена технологијата на московската рафинерија за нафта. Сепак, оштетени биле три куќи.Руското Министерство за одбрана соопшти дека во текот на ноќта и утрото биле соборени вкупно 556 дронови, вклучително и над московскиот регион.Гувернерот на Московската област, Андреј Воробјов, изјави дека жена загинала откако била погодена куќа во градот Химки, северно од Москва. Тој додаде дека спасувачките екипи трагаат по уште едно лице под урнатините.Двајца мажи загинале и во селото Погорелки во округот Митишчи. Во нападите биле оштетени и повеќе станбени згради и инфраструктурни објекти.

Свет | пред 4 дена

(Видео) Бугарија победи на Евровизија 2026 со песната „Bangaranga“

Победник на овогодинешната Евровизија 2026 е Бугарија, која ја претставуваше Дара со песната Bangaranga.Дара со својот настап ги воодушеви и публиката и жирито и убедливо триумфираше на 70. издание на музичкото натпреварување, кое годинава се одржа во Виена.Победничката песна комбинира модерен електро-поп звук со балкански ритми, поради што брзо стана една од омилените меѓу фановите на Евровизија.На второто место заврши Израел.Во финалето на Евровизија учествуваа 25 земји, а победникот беше избран врз основа на гласовите од публиката и националните жири-комисии од 35 држави.

Магазин | пред 4 дена

СДСМ: МБС ГЛОБАЛ – Бугарија – сопственик Максим Димитриевски – Максо од ЗНАМ

Еве Максо, има фирма во Бугарија. Види Максо, ти си сопственик! А изгледа дека не е само една. Додека Максим Димитриевски се претставува како „антикорупционер“ и „голем Македонец“, фактите покажуваат сосема спротивно. Фирмата МБС ГЛОБАЛ била регистрирана на 07.08.2015 година на адреса булевар „Стефан Караџа“ во Бургас, Бугарија. Компанијата се занимава со трговија на големо со непрехранбени производи, велат од СДСМ.„Дополнително, сопругите на Димитриевски и Серафимовски имаат друга компанија во Македонија – АЈФИКС ДОО од Доброшане, Куманово.Максо, колку фирми имаш во Бугарија и колку во Македонија?Колку тендери си наместил?Колку пари си префрлил преку кумови и блиски?Види Максо, доаѓа времето на вистината.Нема повеќе лаги.Максо, доаѓа времето на правдата и одговорноста.Ја предаде својата партија и си ги предаде своите гласачи!Немаш право ти, кој си со „промакедонската“ партија на бугарски државјани, со организираната криминална група ВМРО и со Христијан Мицкоски кој те плаќа преку тендери, да правиш дефокус од Европската реформска агенда.Доста е веќе да вие поради вашиот криминал и корупција го држите народот како заложник и ја држите државата во изолација.Сите – и ти, и Филков, и Сашо Петровски, и целата криминална група предводена од шефот на бандата Христијан Мицкоски – ќе одговарате!Реформи сега. Правда сега. Европа сега“, се вели во соопштението.

Македонија | пред 4 дена

Делови од Старата чаршија во Скопје денеска без струја

Од ЕВН Македонија АД информираат дека поради планирани зафати во електродистрибутивната мрежа, денеска (17 мај) без електрична енергија ќе останат делови од општина Чаир.Според најавата, прекин во снабдувањето со струја ќе има во периодот од 08:00 до 15:00 часот кај корисниците од Старата чаршија, односно дел од улиците „Покриена чаршија“ и „Самарџиска“.Од компанијата апелираат граѓаните навремено да ги прилагодат своите активности додека траат зафатите на електричната мрежа.

Скопје | пред 4 дена

Облаци, сонце и ветер над 60 км/ч: Еве какво време нè очекува

Променливо облачно и посвежо време со сончеви периоди се очекува денеска низ Македонија. Според прогнозата, претежно во крајните западни и источни делови од земјата ќе има услови за повремен локален дожд.Ќе дува умерен до засилен ветер од западен и северозападен правец, кој на одредени места ќе достигнува брзина и над 60 километри на час.Утринските температури ќе се движат од 3 до 10 степени, додека максималните дневни ќе бидат во интервал од 14 до 23 степени.Во Скопје времето ќе биде променливо облачно и посвежо со сончеви периоди. Ќе дува умерен, а во делови од котлината и повремено засилен северозападен ветер. Температурата во главниот град ќе се движи од 7 до 20 степени.Метеоролозите најавуваат дека и во текот на следната седмица ќе продолжи променливото време со сончеви периоди. Локално ќе има услови за развој на нестабилна облачност проследена со пороен дожд, грмежи и засилен ветер, особено во вторник и кон крајот на неделата.

Македонија | пред 4 дена

Потврдено: Угинатиот кит „Тими“ пронајден кај Данска

Потврдено е дека угинатиот грбав кит пронајден кај данскиот остров е идентификуван како „Тими“, соопшти данската Агенција за заштита на животната средина. Судбината на китот со недели ја следеше светската јавност откако се насука во германски води, пренесува „Билд“.Германскиот министер за заштита на животната средина, Тил Бакхаус, изјави дека многу луѓе биле длабоко загрижени за животното и се надевале дека ќе може да биде вратено во дивината.Експерти од данската агенција потврдиле дека угинатиот кит пронајден кај островот Анхолт е истото животно кое претходно било насукано во германските покраини Шлезвиг-Холштајн и Мекленбург-Западна Померанија.Потврдата дошла по откривање на уредот за следење поставен на китот, кој сега е во посед на данските власти.Во моментов нема планови за отстранување на телото на китот, бидејќи се наоѓа подалеку од плажа и не претставува проблем, соопшти претставник на данската агенција за природа.Китот „Тими“ привлече големо внимание откако се насука, а повеќекратните обиди да биде вратен во отворено море беа неуспешни.Локалните власти претходно повеќепати се обидуваа да го спасат, по што приватна иницијатива го финансирала последниот обид за негово враќање во морето, и покрај предупредувањата дека можеби нема да преживее.Експертите наведуваат дека животното било во многу лоша здравствена состојба, а дел од нив сметале дека китот можеби сам избрал плитки води за да угине.

Магазин | пред 4 дена

(Вознемирувачко видео) Автомобил удри во пешаци, се заби во продавница, па возачот нападна минувач со нож

Седум лица се повредени во саботата кога автомобил со голема брзина се забил во пешаци во центарот на северниот италијански град Модена, соопшти полицијата.Полицијата наведе дека возачот, маж во триесеттите години, е уапсен и дека повеќе нема опасност.Претходно италијанските медиуми јавија дека возилото по ударот во пешаците се забило во излог на продавница, а возачот потоа со нож нападнал минувач кој се обидел да го запре.

Свет | пред 4 дена

СДСМ: Кого лаже ВМРО-ОКГ? Мастеф само од 2024 год и унгарскиот кредит има добиено 16,3 милиони евра!

„Промакедонската„ партија ВМРО како што самата се нарекува а не македонска, инаку од основањето бугарска а денес со државјани на Бугарија кои ја водат Владата, дели тендери од кинески и унгарски кредити. Кого лажат од ВМРО-ОКГ, прашуваат од опозициската СДСМ.„Од 2024 година до денес, откако ВМРО е на власт, Мастеф буквално растура со тендери.Заедносо унгарскиот кредит, со Мастеф се операционализирани 13 договори во вредност од 16,3 милиони евра.Оваа фирма досега вкупно има добиено 93 тендери, вредни над 18,3 милиони евра народни пари.Додека нема пари за плати, нема пари за пензии, нема пари за мерки за граѓаните, само има милиони за криминални тендери.Едни исти фирми добиваат сè – и на локално и на централно ниво. Во институции, општини и јавни претпријатија раководени од кадри на ВМРО-ОКГ.Така бездушно се испумпуваат парите на народот.Затоа Мицкоски и ВМРО-ОКГ не сакаат ЕУ, не сакаат европско обвинителство. Се плашат од одговорност.Но нема бегање од одговорноста.Ќе се одговара.Доаѓа време на одговорност, правда и вистина“, се вели во соопштението.

Македонија | пред 4 дена

Нов анимиран хит на Нетфликс: Рекордна гледаност во првата недела

Новиот анимиран филм „Swapped“ постигна рекорден успех на Нетфликс, откако во првата недела од прикажувањето забележа 38,7 милиони прегледи.Филмот, во кој гласовите ги позајмуваат Мајкл Б. Џордан и Џуно Темпл, во периодот од 4 до 10 мај го оствари најголемиот број прегледи што некогаш ги забележал еден анимиран филм на платформата во рок од седум дена, пренесува „Варајети“.Веќе во првите три дена од прикажувањето, „Swapped“ дебитираше како втор најгледан филм на англиски јазик со 15,5 милиони прегледи, по што следеше нагол пораст на гледаноста.Благодарение на силниот интерес, филмот се искачи на првото место на Нетфликс, не само меѓу филмовите на англиски јазик, туку и како најгледан наслов на целата платформа.Зад него се најде трилерот „Apex“ со Шарлиз Терон со 16,2 милиони прегледи, додека трето место го зазеде „Remarkably Bright Creatures“ со 10,4 милиони прегледи.На листата на серии, најгледан второ по реда недела е „Man on Fire“ со 12,6 милиони прегледи.

Магазин | пред 4 дена

СДСМ: Мицкоски и Максим зборуваат за „борба против корупцијата“, а нивните блиски прават стотици илјади евра преку ноќ

Максо вели: „Погледнете во е-урбанизам“. Ние погледнавме. Нема ништо за кумовските односи. Нема договор како преку ноќ да се направат 350.000 евра. Но еве, на Максо и на граѓаните јасно им објаснуваме: Драган Митевски, кум на Максим Димитриевски, преку ноќ купил земјиште од Максим и неговото семејство за 250.000 евра, велат од СДСМ.„Само неколку дена подоцна, истото земјиште го продал на Лидл за 600.000 евра.Со нула инвестиција, заработил 350.000 евра чист профит.Потоа, ги овластил купувачите да спроведат постапка за промена на ДУП кај неговиот кум – градоначалникот Максим Димитриевски.Вчера, со одлука на Советот, ова е целосно реализирано.Ова не е бизнис. Ова е класичен пример на корупција и злоупотреба на функција.Максим Димитриевски, „антикорупционер“ познат по тендерите во Пошта, преку својот кум прави брзи и профитабилни трансакции, а потоа ја користи својата функција за да им обезбеди измена на урбанистичкиот план.Ова е тендер-коалицијата ВМРО-ЗНАМ во акција.Граѓаните заслужуваат да знаат:Додека Мицкоски и Максим зборуваат за „борба против корупцијата“, нивните блиски прават стотици илјади евра преку ноќ со помош на јавната власт.ЗНАМ беше формиран и финансиран од Мицкоски – само еден сателит за растурање на опозицијата, создаден од лични интереси, кому сега му истече рокот на употреба.Ќе го потрошат Филков на темата Груевски и тука е крајот.Најлошото е што Максо, кој прво ја предаде својата партија, а потоа и своите гласачи, денеска служи како мегафон на криминалната организација во заштита на партијата за која Мицкоски вели дека е „промакедонска“ – што е точно.ВМРО е основана како бугарска партија, а денес нејзиното мнозинство го сочинуваат Бугари со македонски пасоши.Оно што Максо мора да знае е дека не само тој, Филков и Сашо Петровски, туку и сите учесници во нивната криминална група предводена од шефот на бандата Христијан Мицкоски – ЌЕ ОДГОВАРААТ!Доаѓа времето на вистината, правдата и одговорноста“, се вели во соопштението.

Македонија | пред 4 дена

(Видео) Идентификуван штипјанецот кој возеше скутер на едно тркало: станува збор за малолетник

Во врска со видео објава споделена на социјалната мрежа Фејсбук, на која се забележува лице кое управува скутер на едно тркало и со таквото однесување ја загрозува безбедноста во сообраќајот, полициски службеници веднаш презедоа мерки и активности за идентификација на лицето.„По преземените активности, од страна на СВР Штип утврдено е дека на 11.05.2026 година околу 21.00 часот, на раскрсницата помеѓу улиците „Сремски Фронт“ и „Борис Крајгер“ во Штип, Е.Б.(15) од Штип сторил кривично дело по член 297-а од Кривичниот законик, како и сообраќајни прекршоци согласно Законот за безбедност на сообраќајот на патиштата.Лицето е пронајдено и идентификувано, а против него се преземаат соодветни законски мерки согласно важечките законски прописи“, велат од МВР.Министерството за внатрешни работи апелира до сите учесници во сообраќајот да се однесуваат совесно и одговорно и да не изведуваат опасни дејствија со кои се загрозува сопствената безбедност, како и безбедноста на останатите учесници во сообраќајот.

Македонија | пред 4 дена

Конго прогласи нова епидемија на ебола, нема вакцина за новиот сој

Во Демократска Република Конго се регистрирани 246 сомнителни случаи на ебола и 80 смртни случаи кои веројатно се поврзани со вирусот, покажуваат најновите податоци. Во моментов не постои вакцина против активната варијанта позната како „бундибуџо“, која се смета за многу смртоносна.Земјата последен пат се соочи со епидемија на ебола меѓу август и декември 2024 година, кога починаа најмалку 34 лица во централниот дел од државата. Најсмртоносната епидемија во историјата на земјата, со повеќе од 100 милиони жители, се случи меѓу 2018 и 2020 година и однесе речиси 2.300 животи.Еболата, која предизвикува високо заразна хеморагична треска, останува голема закана и покрај постоењето на вакцини и терапии за одредени соеви. Според Светската здравствена организација, во последните 50 години во Африка од ебола починале околу 15.000 луѓе, со стапка на смртност од 25 до 90 проценти во претходните епидемии.Африканскиот центар за контрола на болести прогласи нова епидемија во Конго, а здравствените власти предупредуваат на висок ризик од ширење на вирусот. Истовремено, пријавен е и смртен случај во Уганда кај пациент од Конго, кај кого е потврден истиот сој.Министерот за здравство на Конго соопшти дека за сојот „бундибуџо“ нема вакцина ниту специфичен третман, и дека смртноста може да достигне до 50 проценти. Тој додаде дека раното откривање е отежнато бидејќи симптомите често започнуваат со обична треска.Епицентарот на епидемијата е во регионот Итури на североистокот на земјата, кој е богат со злато и има голема дневна миграција на населението, што дополнително го олеснува ширењето на вирусот.Ова е 17. епидемија на ебола во Конго од 1976 година, кога болеста првпат била идентификувана.

Свет | пред 4 дена

Компанија за видеоигри сокри вистински пиратски ковчег на Карибите: Победникот ќе добие богатство вредно 500.000 долари

Во една од најнеобичните маркетиншки кампањи во светот, француската компанија за видеоигри Ubisoft сокри вистински пиратски ковчег на Карибите, чија вредност се проценува на 500.000 долари.Со овој потег е започната глобална потрага по богатство по повод излегувањето на видеоиграта Assassin’s Creed Black Flag Resynced.Компанијата Ubisoft, позната по популарниот серијал Assassin’s Creed, се здружи со француската фирма Unsolved Hunts, специјализирана за организирање вистински потраги по богатство.Резултатот од соработката е кампањата „Gold & Crystal – The Lost Treasure of Edward Kenway“, која на фановите им нуди можност од виртуелни играчи да станат вистински трагачи по богатство.Ковчегот е закопан некаде на Карибите, а неговата содржина е внимателно осмислена за да го долови духот на играта. Во него се наоѓаат златници со логото на Assassin’s Creed, во вкупна вредност од околу 350.000 долари.Покрај златото, во ковчегот има и централен предмет – реплика на мистериозниот кристален череп од играта, украсен со црвен опал. Овој уникатен артефакт, изработен од францускиот занаетчија Hervé Obligi, се проценува на дополнителни 150.000 долари.Патот до богатството води преку решавање на 15 сложени загатки. Иако потрагата тематски е поврзана со светот на Assassin’s Creed Black Flag Resynced, организаторите велат дека претходно познавање на играта не е неопходно.Сите траги можат да се решаваат онлајн, од кое било место во светот, со помош на логика.Дозволена е и тимска работа, но само едно лице може официјално да биде прогласено за пронаоѓач и да ја добие наградата.По успешно решавање на сите задачи и прецизно утврдување на локацијата, организаторите ќе го однесат победникот на Карибите, каде со мапа и лопата лично ќе може да го ископа ковчегот.Според проценките на Unsolved Hunts, на најбрзите учесници ќе им бидат потребни од две до пет години за да стигнат до конечното решение.Официјалниот почеток на потрагата е закажан за 9 ноември, неколку месеци по објавувањето на римејкот на играта на 9 јули.Учеството не е бесплатно. За пристап до потрагата заинтересираните ќе треба да купат еден од пакетите, чии цени почнуваат од околу 40 долари за дигитална верзија.Поскапите пакети, како изданието „Pirate Lord“, кое чини повеќе од 200 долари, вклучуваат и физички предмети – мапа, тетратки за белешки и друштвена игра. Ниту еден пакет не содржи копија од самата видеоигра.Овој амбициозен проект на Ubisoft е уште еден обид компанијата да се врати на финансиска стабилност по серијата лоши деловни одлуки, поради кои нејзината иднина останува неизвесна.

Магазин | пред 4 дена

(Видео) Објавена снимка од излетувањето на авионот на „Кроација ерлајнс“ во Сплит

Аеродромот во Сплит во релативно краток рок повторно е отворен за редовен воздушен сообраќај, по инцидентот при полетување на авион на „Кроација ерлајнс“ кој излета од пистата на пат кон Франкфурт.Инцидентот се случил околу 13:10 часот, кога авионот Airbus A220-300 при полетување излетал од пистата и завршил на тревната површина покрај пистата. Во леталото се наоѓале 130 патници и петчлен екипаж, кои безбедно биле евакуирани.Поради настанот, аеродромот бил привремено затворен, што предизвикало доцнења во летовите, но по интервенција на надлежните служби пистата повторно е ставена во функција околу 16 часот.На социјалните мрежи се шири видео снимено со мобилен телефон на кое се гледа моментот на излетување на авионот од пистата на аеродромот во Сплит. Снимката, како што наведуваат локални медиуми, ја направил сплитскиот фотограф Еди Мештровиќ.

Свет | пред 4 дена

Израел ликвидираше висок командант на Хамас во Газа

Палестинската милитантна група Хамас денеска потврди дека Израел го ликвидирал воениот командант на движењето, Из ал-Дин ал-Хадад.Хамас го осуди, како што наведе, „кукавичкото израелско убиство“ на ал-Хадад, кој ја предводел вооружената бригада „Ал Касам“ во Појасот Газа, пренесува Ал Џезира.Во соопштението се наведува дека ал-Хадад бил убиен во петок навечер заедно со неговата сопруга, ќерка и други палестински цивили, при што Израел се обвинува за кршење на договорот за прекин на огнот и продолжена агресија врз цивилното население.Палестинското движење „Муџахедин“ исто така соопшти дека ал-Хадад е убиен во, како што го нарекоа, израелски напад.Тие го опишаа како борец кој оставил значајно наследство во отпорот против Израел.Израелските одбранбени сили (ИДФ) претходно соопштија дека во воздушен напад во Газа е убиен лидерот на Хамас и шеф на военото крило, Из ал-Дин ал-Хадад.Според ИДФ, тој бил цел на „прецизен удар“ и е означен како еден од главните организатори на нападите од 7 октомври.

Свет | пред 4 дена

Мицотакис: Грција има стратегија за користење на вештачка интелигенција

„Грција има конкретна и сеопфатна стратегија за користење на вештачка интелигенција (ВИ) со цел да обезбеди „подобри, побрзи, поевтини и поедноставни услуги за граѓаните и бизнисите“, изјави грчкиот премиер Киријакос Мицотакис во саботата, на вториот ден од конгресот на владејачката партија.Зборувајќи на панел за вештачка интелигенција, премиерот истакна дека ВИ веќе се применува во здравството и образованието, а Грција развива и инфраструктура, меѓу која и „суперкомпјутер од најнова генерација“ што се гради во Лаврио, кој ќе служи и за јавниот и за приватниот сектор.Тој нагласи дека клучното прашање е која земја и која влада ќе успее да ја искористи моќта на ВИ во корист на граѓаните и економскиот развој, но истовремено и да ги контролира нејзините негативни ефекти.Мицотакис додаде дека новите претпријатија во Грција треба да имаат можност да користат ВИ за раст и финансирање во земјата, како и да се поттикне враќање на Грците кои работат во странство.Според него, целта е создавање екосистем на компании кои ќе произведуваат корисни производи и услуги, вклучително и во одбранбениот сектор, со цел зајакнување на стратешката автономија на државата.Тој оцени дека ова ќе биде клучна стратегија во следниот четиригодишен мандат.

Свет | пред 4 дена

Голема измама во 15 земји во Европа: Лажни лекови продавани како терапии за тешки болести

Властите од 15 земји разбија голема криминална група која измамувала жртви низ Европа и пошироко, продавајќи лажни додатоци во исхраната и лекови за сериозни болести, соопшти агенцијата на ЕУ „Евроџаст“.Заедничката операција на 12 мај резултирала со собирање важни докази, притворање на дел од клучните членови на групата и запленување големи количини додатоци во исхраната. Се сомнева дека групата остварила најмалку 240 милиони евра промет.Властите извршиле претреси на 113 локации во Бугарија, Грција, Унгарија, Полска, Романија и Молдавија. Биле побарани докази од компании во осум земји, а досега се испитани 23 сведоци.Во Грција била спроведена рација во логистичка компанија во регионот Атика.Во Полска биле замрзнати средства во вредност од 1,8 милиони евра.Од 2019 година, групата основала компании преку кои продавала неовластени додатоци во исхраната, пласирајќи над 400 различни производи. Мрежата користела стотици веб-страници и профили на социјални мрежи, често злоупотребувајќи имиња и фотографии на познати личности и лажни лекари за да ги измами жртвите во ЕУ и пошироко.Кога жртвите ќе пополнеле формулар на веб-страниците, криминалната група ги контактирала преку оператори од кол-центри кои се претставувале како лекари или медицински специјалисти. Тие лажно тврделе дека производите се вистински лекови за тешки и неизлечиви болести.Додатоците што ги продавала групата немале никаков медицински ефект и содржеле слични состојки, иако биле рекламирани како третмани за различни болести.

Свет | пред 4 дена

Грција ја преиспитува набавката на француските дронови „Патролер“

Грција ја преиспитува одлуката за набавка на француските дронови „Патролер“, собира дополнителни информации и разгледува алтернативни опции, јавуваат грчките медиуми.Иако набавката сè уште не е откажана и процесот е во тек, блиски извори проценуваат дека шансите Грција да ги набави овие беспилотни летала се намалуваат, пренесува порталот „Катимерини“.Како главни причини се наведуваат долгите доцнења и проблемите со инсталацијата на системот Линк-16, кој е неопходен за интероперабилност, услов поставен од Атина.Од друга страна, француската влада на 8 април ја откажала сопствената нарачка од производителот „Сафран Електроникс & Дифенс“, по шестгодишни одложувања, што дополнително ги зголемило сомнежите за способностите на дронот.Француските воени команданти тврдат дека дронот е премногу бавен, преголем и лесно се детектира со современите системи за електронско војување.Грчкото воено воздухопловство претходно набавило четири дронови „Патролер“ преку агенцијата на НАТО за поддршка и набавки, а испораката била планирана за крајот на 2024 година.Договорот вреден 55 милиони евра бил потпишан во јуни 2023 година, но до крајот на 2025 година само еден прототип поминал тестирања.Тоа предизвикало дополнителна загриженост во Атина за ефикасноста на системот, при што воени извори предупредуваат дека дронот би можел да стане застарен уште пред да биде оперативно распореден.

Свет | пред 4 дена

Кој ќе биде следниот 007? Во тек изборот за наследник на Даниел Крег

Потрагата по следниот Џејмс Бонд официјално започна.„Амазон МГМ Студиос“ започна со аудиции за улогата на агентот 007 во последните недели, дознава „Варајати“, а студиото ја ангажираше Нина Голд да пронајде маж со доволно шарм и закана што ќе го замени Даниел Крег како супер-шпион на Иан Флеминг.„Потрагата по следниот Џејмс Бонд е во тек“, соопшти „Амазон МГМ Студиос“. „Иако не планираме да коментираме специфични детали за време на процесот на кастинг, возбудени сме што наскоро ќе споделиме повеќе вести со фановите на 007, кога ќе дојде вистинското време.“Голд ги разбира сложеностите на големите франшизи и е најпозната по обликувањето на светот на Вестерос во „Игра на тронови“ на HBO. Меѓу нејзините заслуги се серијата на Нетфликс „Круната“, како и пет филмови од франшизата „Војна на ѕвездите“. Токму таа ја избра Дејзи Ридли за улогата на Реј во „Силата се буди“.Нејзиниот список на проекти ги вклучува и „Клетници“, „Марсовецот“ и „Конклејв“. Таа беше номинирана за Оскар за нејзината работа на „Хамнет“ во 2025 година – првата година кога Академијата воведе награда за кастинг.Деби Меквилијамс беше директорка за кастинг за „Здивот на животот“, „Голденај“ и „Казино Ројал“, помагајќи во изборот на Крег, Пирс Броснан и Тимоти Далтон. Шон Конери, Роџер Мур и Џорџ Лазенби се другите актери на кои им е дадена дозволата на Бонд да убиваат.Новиот филм за Џејмс Бонд ќе го режира Денис Вилнев, авторот на франшизата „Дина“, како и „Аритли“ и „Сикарио“. Ејми Паскал, позната по филмовите „Спајдермен“, и Дејвид Хејман од серијалот „Хари Потер“ ќе го продуцираат филмот, чиј сценарио го напиша креаторот на серијалот „Пики блиндерс“, Стивен Најт. Тања Лапоинте („Дина“) е извршен продуцент на филмот.Уште пред да започнат аудициите, имаше многу шпекулации за тоа кој би можел да го преземе пиштолот „Волтер ППК“ на Бонд, а меѓу кандидатите се споменуваат Џејкоб Елорди, Калум Тарнер и Арон Тејлор-Џонсон.

Магазин | пред 4 дена

Експерти на СЗО бараат прогласување на климатската криза за глобална здравствена вонредна состојба

Група водечки меѓународни експерти собрани околу Светската здравствена организација (СЗО) апелираа до ООН да ја прогласи климатската криза за глобална вонредна состојба за јавно здравје, што е највисокото ниво на предупредување што СЗО може да го издаде.Единаесетчлената паневропска комисија оцени дека климатските промени претставуваат „сериозна и непосредна закана“ за здравјето на луѓето ширум светот, посочувајќи на зголемување на бројот на смртни случаи поради топлотни бранови, ширење на заразни болести, загадување на воздухот, недостиг на храна и зголемување на проблемите со менталното здравје.Експертите веруваат дека таквата декларација би поттикнала координиран меѓународен одговор сличен на оној што беше спроведен за време на пандемијата на ковид и епидемијата на мајмунски сипаници. Во исто време, Комисијата остро ги критикуваше субвенциите за фосилни горива, наведувајќи дека тие придонесуваат за околу 600.000 предвремени смртни случаи во Европа годишно, како и дека во некои земји ги надминуваат националните буџети за здравство, објави Гардијан.Поранешната премиерка на Исланд, Катрин Јакобсдотир, и професорот Ендру Хејнс, рекоа дека климатските промени мора да се третираат како здравствена криза со цел да се поттикне побрзо дејствување од страна на владите. Препораките на комисијата беа поддржани од регионалниот директор на СЗО за Европа, Ханс Клуге, и неколку научни институции.СЗО веќе предупредува дека климатските промени ги загрозуваат основните предуслови за здрав живот, вклучувајќи чист воздух, безбедна вода и стабилно снабдување со храна.

Медиасет | пред 4 дена

Трагедија во Виндзор: Војник загина по пад од коњ

Припадник на Кралската церемонијална и коњичка единица на британската армија им подлегнал на тешките повреди откако паднал од коњ, јавуваат британските медиуми.На повредениот војник веднаш му била укажана лекарска помош на лице место, но тој починал, пренесува „Гардијан“.Несреќата се случила по завршување на прикажување на коњичка вежба во градините на Виндзорскиот дворец, соопштила полицијата.Војникот паднал од коњ во петок навечер, по излегување од арената. И покрај брзата медицинска интервенција, тој починал на лице место.Полицијата соопшти дека случајот се третира како неразјаснет, но дека нема сомнителни околности.Манифестацијата во Виндзор продолжува според планот, но ќе биде изоставен дел од програмата на Кралската коњичка единица.Полицијата апелира сите кои имаат информации да се јават и да помогнат во истрагата.Портпарол на Бакингемската палата соопшти дека кралот Чарлс е длабоко потресен од смртта на војникот и ќе стапи во контакт со семејството за да изрази сочувство.

Свет | пред 4 дена

Малолетник со закани принудувал 12-годишно девојче да му праќа експлицитни снимки

Mајка на 12-годишно девојче од Скопје пријавила во полиција дека машко лице, кое исто така е малолетно, со закани ја принудувало нејзината ќерка да му испраќа компромитирачки содржини. Во официјалното соопштение на Министерството за внатрешни работи (МВР) не се открива точната возраст на пријавеното момче, но се прецизира периодот во кој се вршела принудата.„На 13.05.2026 во 12:30 часот во СВР Скопје, 35-годишна жена од Скопје пријави дека во периодот од март 2026 до денот на пријавата, нејзината 12-годишна ќерка под закана преку мобилна апликација испраќала експлицитни фотографии и видеа на малолетник. Се преземаат мерки за расчистување на случајот“, соопштија официјално од СВР Скопје.

Скопје | пред 4 дена

Свети Стефан повторно се отвора: Огромен интерес од целиот свет

Сопственикот на компанијата „Адриатик пропертис“, Петрос Статис, изјави дека владее огромен интерес по веста дека Свети Стефан ќе биде повторно отворен ова лето.„Реакциите од целиот свет се неверојатни. Интересот е огромен“, изјави Статис.Тој посочи дека е многу задоволен од постигнатиот договор, кој резултирал со повторно отворање на Свети Стефан, откако комплексот пет години беше затворен.Статис нагласи дека до договорот дошло затоа што Владата, ЈУ „Морско добро“ и локалната заедница сега се позрели, што, според него, овозможило повторно отворање на еден од најубавите хотели во светот.Тој рече дека во „Адриатик пропертис“ и „Аман“ веруваат дека полесно ќе ги вратат ВИП-гостите отколку работната сила, но изрази надеж дека услугата ќе биде на задоволително ниво.„Се појави огромен интерес за Свети Стефан од целиот свет“, рече Статис и најави дека лично ќе присуствува на отворањето на хотелот.Тој најави и отворање на два луксузни ресторани на Свети Стефан – „Намос“ и „Зума“.Статис оцени дека Црна Гора е прекрасна земја, но дека предуслов за поголем интерес кај високоплатежните гости е подобра патна инфраструктура, особено подобра авионска поврзаност.„Фокусот треба да биде на унапредување на аеродромите и патиштата. И веста дека доаѓа ‘Бритиш ервејс’ е една од најважните вести за луксузниот туризам“, изјави Статис.На прашањето дали Свети Стефан е најголемиот предизвик во неговата кариера, тој се присети на тешките моменти низ кои поминал.„Со Свети Стефан поминавме низ сè. Се сеќавате на црквата поради која моравме да го затвориме хотелот. Имаше сè и сешто. Но добро е, конечно повторно го отвораме“, рече Статис.Говорејќи за хотелот „Дурмитор“, кој е во сопственост на компанијата „Јану“, тој оцени дека северот на Црна Гора е иднината на туризмот.„Тоа е извонредна дестинација, мислам дека наскоро ќе го отвориме и тој хотел“, рече Статис.Тој му се заблагодари и на Новак Ѓоковиќ, посочувајќи дека неговите контакти биле многу корисни во преговорите, а најави и дека тенисерот ќе присуствува на отворањето на Свети Стефан, кое претходно беше најавено за јуни.

Магазин | пред 4 дена