Ристовски: „Секогаш ќе стоиме зад вистинските спортски вредности и не сум навивач на Пелистер, туку поранешен играч на Вардар“

По прозивките од директорот на ФК Вардар, Миленко Неделковски, кон министерот за спорт Борко Ристовски за наводно различен однос кон навредливите песни во спортот, Ристовски изјави дека таквите тврдења се неточни.Тој посочи дека по инцидентот кога РК Пелистер ја прославуваше титулата освоена против Вардар, капитенот Филип Кузмановски се извинил за случувањата.„Констатацијата дека ние не сме реагирале е апсолутно погрешна. Не правиме разлика. Со таква изјава се инсинуира дека сум навивач на Пелистер, а не довчерашен играч на Вардар и поранешен репрезентативец“, изјави Ристовски во емисијата „Директно“.Тој додаде дека кога некој не чувствува потреба да се извини за направена грешка, тоа е личен, а не општествен проблем, нагласувајќи дека Министерството за спорт ќе продолжи да ги поддржува спортските вредности.Во меѓувреме, на социјалните мрежи беше објавено видео со навредлива песна кон Битола и пејачката Каролина Гочева, снимено за време на прославата на шампионската титула, кое првично се појави на Фејсбук-профилот на Миленко Неделковски.

Македонија | пред 13 часа

Отворен нов мост меѓу БиХ и Хрватска по уривањето на мостот кај Градишка

По уривањето на дел од мостот на реката Сава кај граничниот премин Градишка, сообраќајот меѓу Босна и Херцеговина и Хрватска привремено се пренасочува преку новоотворениот мост кај граничниот премин Горња Варош.Новиот мост бил отворен синоќа околу 19 часот како итна мерка за намалување на метежот што се создаде по целосниот прекин на сообраќајот на преминот Градишка.Станува збор за привремено решение кое ќе важи три месеци, а одлуката ја донело Министерството за безбедност на Босна и Херцеговина, откако пред два дена се урнале пешачката патека и дел од заштитната ограда на мостот преку Сава.Според хрватските медиуми, отворањето на мостот во Горња Варош претходно било одложувано поради административни процедури, но сега ќе служи како алтернативна рута додека трае санацијата на оштетениот мост.Со оваа мерка се очекува да се намалат гужвите и застојот за патниците и превозниците, бидејќи преминот Градишка претставува една од најважните сообраќајни врски меѓу БиХ и Хрватска.

Балкан | пред 13 часа

Немири во една од најголемите германски банки по понудата на „УниКредит“

Вработени во германската банка „Комерцбанк“ денеска протестираа против обидот на италијанската банка „УниКредит“ да ја преземе една од најголемите германски финансиски институции.Според „Ројтерс“, демонстрантите се собрале пред годишното собрание на акционерите на „Комерцбанк“, носејќи транспаренти со пораки „УниКредит, заминете!“ и „#БезСпојување #БезОрчел“, алудирајќи на извршниот директор на „УниКредит“, Андреа Орчел.Синдикалниот претставник и член на надзорниот одбор на „Комерцбанк“, Фредерик Вернинг, изјавил дека вработените немаат доверба во плановите на италијанската банка.„Длабоко сме загрижени дека реализацијата на овие планови ќе биде стратешка грешка, ќе доведе до губење работни места и ќе им наштети на германските мали и средни претпријатија“, изјавил Вернинг.Организаторите соопштиле дека на протестот присуствувале околу 150 вработени.„УниКредит“ на почетокот на мај официјално поднесе понуда за преземање на „Комерцбанк“ преку размена на акции, во трансакција вредна околу 35 милијарди евра.Италијанската банка веќе поседува околу 30 проценти од акциите на германската банка и со новата понуда се обидува дополнително да го зајакне своето влијание.На преземањето се противи и германската влада, која поседува околу 12 проценти од акциите на „Комерцбанк“, како и раководството на банката.

Свет | пред 13 часа

Шпионски скандал кај претседателката Сиљановска: обвинителот пет месеци чека снимки од видеo-надзорот за да види дали вработени краделе податоци

Повеќе од пет месеци, далеку од очите на јавноста, Обвинителството за гонење организиран криминал и корупција води предистражна постапка за сомнежи за недозволени активности во Кабинетот на претседателката Гордана Сиљановска-Давкова во Вила Водно.Предметот е отворен по известување од МВР – Сектор за компјутерски криминал, а се однесува на настан од 24 ноември 2025 година и, како што Обвинителството вели за „Скопје1“, „постоење индиции за преземени недозволени активности од висок државен интерес“.Според информациите од ОЈО ГОКК, истрагата се однесува на сомнежи дека доверливи електронски податоци од Кабинетот на претседателката биле неовластено преснимувани, а неофицијално се шпекулира дека дел од информациите можеле да завршат кај странски разузнавачки структури.Во рамки на постапката, обвинителството побарало судска наредба за пребарување на компјутерски систем, екстракција на податоци од компјутери и лаптопи, како и обезбедување на снимките од безбедносните камери во Вила Водно.„Дополнително, до Кабинетот на Претседателката беше упатено барање за доставување копии од видео записите од безбедносните камери поврзани со пријавениот настан, за периодот во кој истиот се случил“, велат од ОЈО ГОКК за „Скопје1“Но, и покрај сериозноста на предметот, обвинителството наведува дека со месеци не може да дојде до снимките од видео надзорот.„На почетокот на 2026 година, по добиено известување дека Кабинетот на Претседателката не располага со копии од видео надзорот, бидејќи опремата е набавена преку СОЗР, а надлежноста за ракување и чување на записите е кај МВР, предметниот јавен обвинител се обрати и до СОЗР и до МВР за нивно итно обезбедување“, соопшти обвинителството за „Скопје1.Од СОЗР, според ОЈО ГОКК, било одговорено дека тие не располагаат со снимките, туку само ја набавиле опремата, додека чувањето на записите е во надлежност на МВР.„И покрај тоа, од страна на МВР до денес не се доставени повратни информации, ниту известување за преземени дејствија во врска со обезбедувањето на копиите од видео надзорот“, додаваат од обвинителството.Во март годинава, МВР доставило и два мобилни телефони одземени од пријавено лице кое работело во Вила Водно, по што обвинителството издало наредба за нивна екстракција и анализа.„На 16.03.2026 година, МВР достави известување за дел од преземените активности кои се однесуваат на обезбедување пристап до криптираните податоци од дотогаш екстрахираната компјутерска опрема“, наведуваат од ОЈО ГОКК.Дополнително, обвинителството побарало и анализа на податоците од телефоните, како и заедничка анализа на податоците екстрахирани од компјутерската опрема.Неофицијално, сомнежите се дека вработен во Кабинетот на претседателката пристапувал до електронски податоци, ги копирал, енкриптирал и складирал на надворешни носачи на податоци, а случајот наводно бил откриен од друго ИТ лице кое го пријавило во МВР.Во меѓувреме, според неофицијални информации, до обвинителството била доставена и кривична пријава во која се изнесуваат сериозни наводи за шпионажа, прикривање докази и злоупотреба на службена положба, а се споменуваат и лица од високи државни институции.„Скопје1“ не може независно да ја потврди автентичноста на тие наводи, ниту точноста на содржината на пријавата, а за лицата што се споменуваат нема официјална потврда дека против нив се води постапка.„Скопје1“ побара став и од Кабинетот на претседателката Гордана Сиљановска-Давкова. Доколку добиеме одговор, истиот ќе биде дополнително објавен.

Македонија | пред 13 часа

Денеска се одбележува 20 Мај – Денот на пожарникарството

По повод 20 Мај – Денот на пожарникарството, Територијалната противпожарна бригада на Град Скопје и оваа година ќе го одбележи празникот посветен на пожарникарите и нивната улога во заштитата на граѓаните и имотот.Во рамки на одбележувањето, традиционално е предвидена и посета на градоначалникот на Скопје, Орце Ѓорѓиевски, на противпожарната единица во Автокоманда.Од бригадата посочуваат дека противпожарните единици во земјава и понатаму се соочуваат со сериозни предизвици, пред сè поради недостиг на кадар и застарена опрема, иако во последните години се прават напори за подобрување на условите.На денешен ден, во 1836 година, во Битола бил формиран првиот противпожарен одред.

Скопје | пред 14 часа

„Наместо осуда, Венко Филипче молчи и соработува со негаторите на Македонија“, велат од ВМРО-ДПМНЕ

ВМРО-ДПМНЕ преку соопштение обвини дека лидерот на СДСМ, Венко Филипче, молчи на, како што велат, навредливите изјави од Бугарија и не застанува во одбрана на македонскиот идентитет.Од партијата велат дека речиси две недели Филипче избегнува јасно да ја осуди изјавата на бугарската министерка Петрова Чамова, која македонскиот народ го нарекла „северномакедонци“.Во соопштението се наведува дека Филипче „молчи за навредите, прави лични калкулации и продолжува со сервилност“, а дополнително му се забележува и тоа што не се оградил од ставовите на членот на Извршниот одбор на СДСМ, Рубин Земон, кој, според ВМРО-ДПМНЕ, изјавил дека Гоце Делчев е „мит“ и дека „не направил ништо за Македонија“.Од ВМРО-ДПМНЕ оценуваат дека ваквиот пристап претставува политика на попуштање и отвора простор за нови уцени кон Македонија.„Македонскиот идентитет не е предмет на преговори. Македонскиот јазик и историја не се тема за политички пазарења“, се наведува во соопштението, од каде додаваат дека Македонија заслужува политичари кои ќе ја бранат државата, а не, како што велат, да молчат пред нејзините негатори.

Македонија | пред 14 часа

Автомобил и мотор се судрија на „Рузвелтова“ во Скопје

Сообраќајна несреќа меѓу автомобил и мотоцикл се случи денеска на улицата „Рузвелтова“ во Скопје.Засега нема официјални информации за состојбата на учесниците во несреќата.

Скопје | пред 14 часа

Пациент со симптоми на хантавирус хоспитализиран во Лисабон

Во болницата „Сао Франциско Шавиер“ во Лисабон во понеделникот бил примен пациент за кого постои сомнеж дека е заразен со хантавирус.Станува збор за возрасен португалски државјанин со симптоми слични на грип, кој патувал со авион, а неговиот случај се поврзува со епидемијата на хантавирус што избувна на крузерот „МВ Хондиус“, каде што веќе се потврдени повеќе случаи на зараза.Главната управа за здравство на Португалија соопшти дека се спроведени сите пропишани процедури, вклучително и упатување на пациентот во референтната болница „Кури Кабрал“.Истата болница беше референтен центар и за време на пандемијата со ковид-19, а токму таму во Лисабон беше примен и првиот пациент заразен со коронавирус.Според насоките на португалските здравствени власти, дури и ако тестот е негативен кај сомнителен или веројатен случај, пациентот мора повторно да биде тестиран.Во правилата се наведува дека во рок од најмногу 42 дена од последната изложеност на потврден или веројатен случај, лицето мора повторно да се тестира и повторно да се класифицира според резултатите.Како „сомнителен случај“ се смета секое лице кое престојувало во превозно средство, како авион или брод, во кое бил регистриран потврден или веројатен случај на хантавирус.Исто така, сомнителни се и сите лица кои биле во контакт со патник или член на екипажот на бродот „МВ Хондиус“ од 5 април 2026 година до истекот на инкубацискиот период од 42 дена, доколку покажуваат симптоми како висока температура, болки во мускулите, треска, главоболка и дигестивни или респираторни проблеми.Случаи на хантавирус се регистрирани и во Германија, Италија, Шпанија, Обединетото Кралство и Соединетите Американски Држави, каде што се применуваат слични мерки според препораките на Светската здравствена организација.Мерките вклучуваат шестнеделен карантин за високоризични контакти, ПЦР-тестирање, строг здравствен надзор, ограничување на движењето и одржување физичка дистанца од еден и пол до два метра.

Свет | пред 14 часа

Земјотрес со јачина од 6 степени ја погоди Турција

Земјотрес со јачина од 6 степени според Рихтеровата скала денеска ја погоди Турција, соопшти Европско-медитеранскиот сеизмолошки центар.Епицентарот на потресот бил на длабочина од 10 километри, на околу 21 километар од градот Малатија во источниот дел на земјата.Според првичните информации, засега нема извештаи за повредени лица или за поголема материјална штета.Очевидци на страницата на Европско-медитеранскиот сеизмолошки центар навеле дека потресот бил силен и дека се нишале лустери и мебел во домовите.Земјотресот бил почувствуван и во соседна Сирија, како и на Кипар.

Свет | пред 14 часа

Си Џинпинг и Владимир Путин потпишуваат нови договори за соработка

Кинескиот претседател Си Џинпинг и рускиот претседател Владимир Путин започнаа церемонија на потпишување повеќе договори за соработка меѓу двете држави.Двајцата лидери веќе потпишаа заедничка изјава за понатамошно зајакнување на стратешката координација и за „продлабочување на добрососедската и пријателската соработка“.По ракувањето пред камерите, Си и Путин, држејќи црвени папки, го потпишаа првиот документ, а се очекува да следуваат уште околу дваесет договори.Документите треба дополнително да го зацврстат сеопфатното партнерство и стратешката интеракција меѓу Москва и Пекинг.Договорите се однесуваат и на повеќе области, вклучително трговската, економската и технолошката соработка.

Свет | пред 14 часа

Пациент со ебола од Конго хоспитализиран во германска клиника

Американски лекар заразен со вирусот ебола во Демократска Република Конго е пренесен на лекување во берлинската клиника „Шарите“, соопшти германското Министерство за здравство.Пациентот бил транспортиран во текот на ноќта со специјален авион за високоинфективни пациенти од Уганда до Берлин, а потоа и со специјално возило до клиниката. Во Германија биле донесени и шест лица кои биле во контакт со него и имаат висок ризик од заразување.Од германското Министерство за здравство уверуваат дека за населението не постои опасност, бидејќи пациентот е сместен во високообезбедена изолирана единица со посебни системи за вентилација, филтрација и обработка на отпадни води.Според информациите, Соединетите Американски Држави побарале помош од Германија поради искуството на германските лекари во третман на пациенти со ебола и пократкото време на транспорт.За актуелната епидемија е одговорна ретката варијанта Бундибугјо, за која засега не постојат ниту вакцина ниту терапија. Светската здравствена организација повторно прогласи здравствена вонредна состојба од меѓународни размери.Генералниот директор на СЗО, Тедрос Гебрејесус, најави состанок на Комитетот за итни случаи, кој треба да даде препораки за понатамошно справување со епидемијата и можностите за брз развој на вакцина.Како реакција на ширењето на вирусот, Руанда ја затвори границата со источниот дел на Конго, додека САД воведоа највисоко предупредување за патување и ограничувања за влез на лица кои престојувале во Конго, Уганда или Јужен Судан.Според податоците на СЗО, досега во Конго се потврдени 30 случаи на ебола, но постојат повеќе од 500 сомнителни случаи. Во погодените региони досега се регистрирани 134 смртни случаи, а здравствените власти сè уште утврдуваат колку од нив се директно поврзани со болеста.

Свет | пред 14 часа

Песков: Не треба да се споредуваат посетите на Путин и Трамп во Пекинг

Кремљ порача дека нема смисла да се споредува свечениот пречек на рускиот претседател Владимир Путин во Пекинг со посетата на американскиот претседател Доналд Трамп на Кина минатата недела.Портпаролот на Кремљ, Дмитриј Песков, изјави дека поважно е да се анализира содржината на разговорите отколку церемонијалните детали.„Има смисла да се споредува содржината“, изјави Песков за руската државна телевизија, одговарајќи на прашање за можните споредби меѓу двете посети.„Не е секогаш лесно да се спореди содржината, бидејќи не се гледа сè на површината. Сепак, главната вредност лежи во содржината, а не во церемонијалните аспекти“, додаде тој.Изјавата на Песков доаѓа во време кога рускиот претседател Владимир Путин престојува во дводневна посета на Кина, каде што со кинескиот лидер Си Џинпинг разговара за продлабочување на стратешката соработка и за актуелните глобални прашања.

Свет | пред 14 часа

Москва и Пекинг најавија продлабочување на стратешките односи

Во Пекинг започна билатералната средба меѓу рускиот претседател Владимир Путин и кинескиот претседател Си Џинпинг.Рускиот лидер оцени дека партнерството меѓу двете држави претставува пример за соработка и истакна дека Москва има намера дополнително да ги развива односите со Пекинг.„Нашето партнерство е пример за меѓудржавна соработка“, изјави Путин на почетокот на разговорите.Кинескиот претседател Си Џинпинг, пак, порача дека односите меѓу Кина и Русија влегле во „нова фаза на поголем напредок и побрз развој“.Тој нагласи дека меѓусебната доверба меѓу двете земји дополнително се зацврстува.Средбата се одржува во рамки на дводневната посета на Владимир Путин на Кина, за време на која двајцата лидери треба да разговараат за продлабочување на економската, енергетската и политичката соработка, како и за актуелните глобални прашања.

Свет | пред 15 часа

Трамп: „Си Џинпинг никогаш не ми кажа дека Путин можеби ќе зажали за инвазијата во Украина“

Американскиот претседател Доналд Трамп ги демантираше медиумските извештаи според кои кинескиот претседател Си Џинпинг му рекол дека рускиот претседател Владимир Путин би можел да зажали поради инвазијата врз Украина.„Фајненшл тајмс“ објави дека Си наводно ја изнел таа оценка за време на разговорите со Трамп во Пекинг, во рамки на пошироките дискусии посветени и на војната во Украина.Весникот, повикувајќи се на повеќе извори запознаени со исходот од средбата меѓу Си и Трамп, наведе дека пораките на Кина во врска со Путин и одлуката за напад врз Украина биле поостри отколку претходно.Сепак, Трамп пред новинарите изјави дека Си никогаш не кажал такво нешто.„Никогаш не го рече тоа“, изјави американскиот претседател.Трамп претходно соопшти дека за време на минатонеделната посета на Пекинг разговарал со Си Џинпинг за војната во Украина и дека двајцата се согласиле оти сакаат крај на конфликтот.Во меѓувреме, рускиот претседател Владимир Путин вчера започна дводневна посета на Кина.Според Кремљ, Путин и Си Џинпинг ќе разговараат за проширување на билатералната соработка, како и за актуелните глобални прашања.Рускиот претседател во Пекинг е придружуван од делегација составена од министри, бизнис-лидери и високи државни функционери, меѓу кои и гувернерката на Централната банка Елвира Набиулина, како и директорите на големите енергетски компании „Гаспром“ и „Роснефт“.

Свет | пред 15 часа

ЕУ и САД договорија укинување и намалување на дел од царините

Претставниците на Европскиот парламент и земјите-членки на Европската Унија постигнаа договор за укинување на царините за увоз на индустриски производи од Соединетите Американски Држави и намалување на тарифите за дел од земјоделските производи.Договорот, кој произлегува од трговскиот договор меѓу ЕУ и САД, склучен минатиот јули, предвидува преференцијален пристап за американски морски плодови и одредени земјоделски производи, како млечни производи, овошје, соино масло, свинско месо и месо од бизон.Во исто време, договорот содржи и заштитен механизам што ќе ѝ овозможи на ЕУ повторно да воведе царини доколку зголемениот увоз од САД предизвика сериозна штета за европските производители.Од Советот на Европската Унија соопштија дека Европската комисија ќе може да покрене истрага по барање на земјите-членки, индустријата или синдикатите, или по сопствена иницијатива.Доколку се утврди дека увозот предизвикува штета на европската економија, Комисијата ќе може делумно или целосно да ја суспендира примената на регулативата.Договорот предвидува и можност Брисел привремено да ги суспендира поповолните услови за увоз на производи од челик и алуминиум, доколку САД до крајот на годината не ги намалат царините за европските производи на 15 проценти.Бернд Ланге оцени дека договорот ќе придонесе за поголема предвидливост во трансатлантските трговски односи.Сличен став изрази и Михаел Дамијанос, кој порача дека ЕУ останува доверлив партнер во глобалната трговија.Договорот го поздрави и претседателката на Европската комисија, Урсула фон дер Лајен, која повика процесот на усвојување да биде завршен што е можно побрзо.Според најавите, Европскиот парламент би можел да гласа за договорот во јуни, а неговото стапување во сила би овозможило намалување или укинување на царините пред рокот 4 јули, поставен од американскиот претседател Доналд Трамп.

Свет | пред 15 часа

„Колку народни пари потрошил Фетаи додека не се појавувал на работа - Мицкоски да иницира одговорност за несовесно работење“, велат од Левица

Левица преку соопштение остро реагираше на, како што велат, неодговорното однесување на вицепремиерот Арбен Фетаи, обвинувајќи го дека со месеци не се појавува на работа, не присуствува на владините седници и не одговара пред Собранието, а продолжува да ја користи функцијата и бенефициите.Од партијата наведуваат дека додека Владата зборува за недостиг на средства за плати, здравство и социјални мерки, истовремено дозволува функционер кој, според нив, не ја извршува функцијата да продолжи да прима плата и други привилегии.Во реакцијата се оценува дека станува збор за „расипничко и неодговорно владеење“, а премиерот Христијан Мицкоски е обвинет дека не презема никаква одговорност и покрај, како што наведуваат, јавно потврдените информации за отсуството на Фетаи.Левица јавно прашува колку државни средства биле исплатени за плати, патни трошоци и привилегии на вицепремиерот, како и дали Владата ќе иницира постапка за утврдување одговорност за несовесно трошење буџетски средства.Од партијата бараат итно разрешување на Арбен Фетаи и проверка на сите исплати и трошоци направени за време на неговото отсуство.

Македонија | пред 15 часа

Денеска без струја Центар, Карпош и Кисела Вода

ЕВН Македонија информира дека на 20 мај 2026 година, поради планирани зафати во електродистрибутивната мрежа, без електрична енергија ќе останат повеќе делови од Скопје.Во периодот од 09:00 до 12:00 часот без струја ќе бидат корисниците од улицата „Црвена Вода“ број 7 во Центар.Од 09:00 до 13:00 часот прекин ќе има на улицата „Саса“ – крак 24 во Кисела Вода.Во периодот од 09:00 до 14:00 часот без електрична енергија ќе остане дел од корисниците на улица 6 во населбата Бардовци, во Карпош.Дополнително, од 09:15 до 15:15 часот прекин ќе има за корисниците од улиците „Самоилова“ и „Јоаким Крчовски“, како и за објектот на Музеј на современа уметност – Скопје во општина Центар.

Свет | пред 15 часа

Променливо облачно време со сончеви периоди и засилен ветер

Според информациите од УХМР, денеска времето ќе биде променливо облачно со сончеви периоди.Во крајните западни и источни делови од земјата ќе има услови за слаб локален дожд.Ќе дува умерен, а долж Повардарието повремено засилен северен ветер со брзина до 50 километри на час.Минималната температура ќе се движи од 5 до 13 степени, додека максималната дневна температура ќе достигне од 19 до 26 степени.Во Скопје времето ќе биде променливо облачно со сончеви периоди, проследено со умерен до повремено засилен северен ветер.Температурата во главниот град ќе се движи од 9 до 24 степени.

Македонија | пред 15 часа

Повеќе населби во Ѓорче Петров денеска без вода поради дефект

Регионалниот центар за управување со кризи – Скопје информира дека денеска, 20 мај 2026 година, поради уличен дефект на водоводна цевка на улицата „Лука Геров“ бр. 38, без вода ќе останат повеќе населби во општина Ѓорче Петров.Прекин во водоснабдувањето ќе имаат корисниците од населбите Даме Груев, Ново Село, Волково, Стопански Двор, Кисела Јабука, Орман и Никиштани.Водоснабдувањето ќе биде прекинато од 08:30 часот и ќе трае до завршување на санацијата на дефектот.

Скопје | пред 16 часа

Колку често треба да ја чистите рерната? Валканата рерна може да влијае на вкусот и безбедноста на храната

Чистењето на рерната често е една од помалку омилените домашни обврски, но има голема улога во одржувањето на хигиената, безбедноста и квалитетот на храната.Зачестеноста на чистењето зависи од тоа колку често се користи рерната. Во домаќинствата каде секојдневно се подготвуваат повеќе оброци, се препорачува чистење на секои неколку недели или најмалку еднаш месечно.На тој начин се спречува натрупување на маснотии и остатоци од храна.Запуштената рерна може да претставува здравствен ризик, бидејќи загорените остатоци при високи температури можат да ослободуваат штетни материи. Исто така, мирисите од претходните јадења лесно можат да се пренесат на новата храна.Покрај тоа, нечистотијата влијае и на квалитетот на подготовката – храната може да го промени вкусот и да ја изгуби природната арома.Постои и безбедносен аспект, бидејќи наслагите од маснотии и загорени остатоци ја зголемуваат можноста за појава на пожар.Нередовното одржување влијае и на работата на рерната, ја отежнува рамномерната распределба на топлината и може да доведе до побрзо оштетување на грејачите и вентилаторите.Поради сето ова, редовното чистење на рерната е важно за здравјето, безбедноста и квалитетот на секојдневната исхрана.

Магазин | пред 1 ден

СДСМ: Професорката Гордана Сиљановска-Давкова падна на испит во Словенија

Опозициската СДСМ упати критики до претседателката Гордана Сиљановска-Давкова, оценувајќи дека со своите ставови изнесени во Словенија ја слабее позицијата на Македонија во процесот на европската интеграција.Од СДСМ велат дека наместо „јасно и недвосмислено“ да ја потврди европската обврска за внесување на малцинствата во Уставот, Сиљановска-Давкова продолжува со, како што наведуваат, „празна реторика“.Според партијата, преговарачката рамка за членство во Европската Унија, во која е вклучен и францускиот предлог, го гарантира македонскиот идентитет и македонскиот јазик.„Малцинствата во Уставот не се закана, туку решение. Решение за напредок кон Европа и зајакнување на македонскиот идентитет“, наведуваат од СДСМ.Партијата оценува и дека македонскиот Устав ефективно ги препознава правата само на малцинствата наведени во Преамбулата, додавајќи дека изјавите на Сиљановска-Давкова претставуваат „разочарувачки слабо толкување“ на уставните прашања.Во соопштението, СДСМ ја обвини и ВМРО-ДПМНЕ дека темата за малцинствата ја користи за внатрешна пропаганда, наместо за исполнување на европските обврски.

Македонија | пред 1 ден

Хороскопски знаци кои глумат дека ништо не ги повредува

Некои луѓе делуваат ладно, смирено и недопирливо, но зад таквиот впечаток често кријат многу повеќе емоции отколку што покажуваат. Според астрологијата, одредени хороскопски знаци особено тешко признаваат дека нешто ги повредило, па повеќе сакаат да изгледаат рамнодушно отколку да покажат ранливост.СкорпијаСкорпиите ретко покажуваат колку навистина ги боли нешто. Дури и кога некој длабоко ќе ги повреди, често ќе се однесуваат како воопшто да не им е грижа. Сепак, тие паметат сè и долго ги анализираат ситуациите.ЈарецЛуѓето родени во знакот Јарец сакаат да остават впечаток на рационални и стабилни личности. Кога нешто ќе ги погоди, најчесто уште повеќе се повлекуваат во себе и се фокусираат на работата или обврските. Иако делуваат ладно, разочарувањата ги паметат многу подолго отколку што другите мислат.ВодолијаВодолиите често глумат емоционална дистанца и се однесуваат како туѓите мислења да не ги интересираат. Но, многу од нив внимателно забележуваат сè и многу работи сфаќаат лично, иако ретко го признаваат тоа. Кога се повредени, најчесто се дистанцираат наместо отворено да ги покажат чувствата.

Магазин | пред 1 ден

Планирате патување? Еве колку долго мачката може да остане сама дома

Ако планирате патување, продолжен викенд или посета на роднини, едно од најчестите прашања е што да се прави со мачката и колку долго е безбедно да остане сама дома.За разлика од кучињата, мачките поголемиот дел од денот го поминуваат спиејќи, па неколку часа самотија најчесто не им претставуваат проблем. Тие се навикнати сами да си најдат забава и често пронаоѓаат мирни места за одмор.Возрасна мачка може да остане сама и една ноќ, доколку е навикната на просторот во кој живее. Сепак, експертите предупредуваат дека не треба да бидат оставени без надзор подолго од 24 до 48 часа.Микел Делгадо истакнува дека мачките се чувствителни на промени во рутината, па подолгото отсуство на сопствениците може да предизвика стрес, анксиозност и промени во однесувањето.Таа предупредува и дека во случај на непредвидени ситуации, како здравствени проблеми, истурена вода или нечист песок, нема кој да реагира, поради што оставањето мачка сама повеќе денови не е безбедна опција без редовен надзор.Кај мачињата важат построги правила. Мачиња помлади од три месеци не треба да остануваат сами подолго од 20 минути, бидејќи се многу чувствителни и лесно можат да се најдат во опасност. Помеѓу третиот и шестиот месец можат да поднесат нешто подолг период на самотија, додека дури околу осмиот месец можат да останат сами и до половина ден.Според Микел Делгадо, дури по навршена една година мачките можат без поголем стрес да се справат со целодневно отсуство на сопственикот, но и тогаш е важно постепено да се навикнуваат на самотија.Доколку планирате подолго отсуство, важно е однапред да обезбедите сè што ѝ е потребно на мачката – доволно храна и свежа вода, чист сад со песок, играчки и безбедна околина. Се препорачува и да се отстранат опасните предмети, да се затворат ризичните простории и да се остават предмети со мирис на сопственикот за мачката да се чувствува посигурно.Најдобро решение е да замолите доверлива личност или да ангажирате некој што секојдневно ќе ја посетува мачката, ќе ја храни, ќе чисти и ќе ја проверува нејзината состојба. Така миленикот ќе биде безбеден и спокоен додека не сте дома.

Магазин | пред 1 ден

Премиерот на Гренланд нема да присуствува на отворањето на новиот американски конзулат

Премиерот на Гренланд, Јенс-Фредерик Нилсен, нема да присуствува на отворањето на новиот конзулат на Соединетите Американски Држави во Нук, објавија локалните медиуми.Конзулатот треба да биде отворен со прием во новите простории во центарот на Нук, но Нилсен изјавил дека ќе ја одбие поканата поради актуелните тензии меѓу Гренланд и САД.„Не донесовме формална одлука од принципиелни причини, но јас нема да учествувам“, изјавил Нилсен.Според извештаите, повеќе поканети гости исто така одлучиле да не присуствуваат на настанот поради реакциите што ги предизвикаа изјавите на американскиот претседател Доналд Трамп, кој претходно изрази желба Гренланд да биде под американска контрола.Данската пратеничка Нааја Х. Натаниелсен исто така соопшти дека ќе ги одбие поканите од американскиот конзулат, наведувајќи дека односите меѓу двете страни моментално се тензични.Гренланд, автономна територија на Данска, подолго време е во фокусот на американскиот интерес поради стратешката позиција и богатите минерални ресурси.

Свет | пред 1 ден

Обединетите нации за израелската акција врз флотилата: Не изгледа дека е почитувано меѓународното право

Обединетите нации денеска изразија сериозна загриженост за безбедноста на активистите на бродот „Сумуд“, дел од глобалната флотила што пловела кон Појасот Газа, откако Израел ја презеде контролата врз конвојот.Портпаролот на ОН, Стефан Дижарик, изјави дека организацијата е „многу загрижена“ за безбедноста на лицата на бродот и нагласи дека мора да се почитува меѓународното право на отворено море.На прашањето дали приведувањето на активистите претставува прекршување на меѓународното право, Дижарик рече дека сè уште нема целосни информации за начинот на кој била спроведена операцијата, но додаде дека „не изгледа како да била изведена со целосно почитување на меѓународното право“.Тој повторно го повика Израел да ги олесни ограничувањата за внесување хуманитарна помош во Газа.Според ОН, ситуацијата во Газа останува критична, со недостиг од резервни делови за генератори и пумпи, натрупан отпад и недостаток на материјали за обновување на засолништата во енклавата.

Свет | пред 1 ден