Лидерот на ДУИ, Али Ахмети, денеска во седиштето на партијата во Тетово се сретна со вршителката на должноста амбасадор на Соединетите Американски Држави во Скопје, Никол Варнс.
За средбата информираше самиот Ахмети преку објава на социјалните мрежи, наведувајќи дека разговарале за актуелните политички состојби во земјата, за демократските институции и за стратешкото партнерство меѓу Македонија и САД.
Ахмети ѝ се заблагодарил на Варнс за нејзиниот, како што наведе, посветен и конструктивен ангажман и за придонесот во зајакнувањето на односите меѓу двете земји.
Тој истакнал дека САД имаат незаменлива улога како стратешки партнер на Македонија и клучен фактор за мирот, безбедноста и стабилноста во регионот. Воедно, нагласил дека американската поддршка била од суштинско значење за постигнувањето на Охридскиот рамковен договор и останува важна за неговото целосно спроведување.
Според Ахмети, на средбата била потврдена и посветеноста на ДУИ кон стратешкото партнерство со САД, спроведувањето на Охридскиот рамковен договор и европската перспектива на државата.
