Џозеф Бајден и нареди на војската да изгради привремено пристаниште во Газа за да достави повеќе хуманитарна помош на палестинската територија под израелска опсада.
Во синоќешниот говор за состојбата на нацијата во американскиот Конгрес, Бајден го повтори својот повик за итно примирје од најмалку шест недели меѓу Израел и Хамас, што исто така ќе овозможи ослободување на сите заложници кои се уште се држат во Појасот Газа.
„Вечерва им наредувам на американските воени сили да спроведат итна мисија за воспоставување привремено пристаниште на брегот на Газа во кое може да се сместат големи бродови кои носат храна, вода и лекови и привремени засолништа“, рече Бајден во говорот пред Конгресот.
Изградбата на тоа пристаниште не бара распоредување на американски војници на копно, рече тој.
Тој ја повика израелската влада да дозволи повеќе хуманитарна помош да влезе во Газа и нагласи дека таквата помош не може да биде споредна или за која може да се преговара.
Изградбата на привременото пристаниште ќе трае неколку недели и ќе се изведува со „сојузниците“ на копното, како и со ОН и хуманитарните организации, соопштија претходно високи американски претставници.
Еден од официјалните лица рече дека главниот елемент ќе биде изградбата на привремен брег и дека пристаништето ќе овозможи дополнителна помош еднаква на стотици камиони да пристигнува во Газа секој ден.
Израел е информиран за иницијативата и САД треба да соработуваат со Израелците за безбедносни прашања, додаваат изворите.
Белата куќа не го крие своето незадоволство што Израел го држи Појасот Газа под опсада од почетокот на војната против Хамас на 7 октомври минатата година, по нападот на организацијата на израелска територија.
Хуманитарната помош која Израел ја дозволува пристигнува во мали количини, а територијата влезе во голема хуманитарна криза.
