Зголемената побарувачка од центрите за податоци и одбранбениот сектор, намаленото производство и најавените американски царини придонесоа цената на бакарот на Лондонската берза за метали (ЛМЕ) да достигне рекордно ниво.
Тон бакар денеска се тргуваше за 14.642,50 долари, откако вчера цената изнесуваше 14.708,50 долари.
Растот на цената започна на почетокот на месецот, по најавата на американскиот претседател Доналд Трамп дека од следната година ќе биде воведена царина од 15 отсто за бакарот, додека во 2028 година таа би достигнала 30 отсто.
Бакарот е една од клучните суровини за индустријата, електрониката, електроенергетските мрежи и градежништвото, а неговата важност дополнително расте со ширењето на центрите за податоци и развојот на современата инфраструктура.
Податоците на Меѓународната група за истражување на бакарот покажуваат дека производството на овој метал во првата половина од годината се намалило за 1,1 отсто. Значителен пад е забележан кај водечките производители, чилеанската „Коделко“ и американската „Фрипорт-МекмоРан“.
„Коделко“ на крајот на август соопшти дека во првите шест месеци од годината произвела 11 отсто помалку бакар во споредба со истиот период лани. Намалувањето е поврзано со несреќата во рудникот Ел Тениенте во јули 2025 година, кога загинаа шест рудари.
„Фрипорт-МекмоРан“ на крајот на јули објави дека производството на бакар од јануари до јуни било за 20 отсто пониско, поради несреќата во рудникот Грасберг во Индонезија, која се случи пред една година и во која загинаа седум рудари.
Дополнителен притисок врз снабдувањето создаваат и промените во рударските политики во Африка. Аналитичарите посочуваат дека повеќе влади на континентот бараат поголема контрола врз домашните рудни богатства, преку промени во законите и барања за поголем сопственички удел или посилно учество на домашните компании.
