Американскиот репрезентативец Фоларин Балогун призна дека контроверзната одлука на ФИФА да му ја укине суспензијата, донесена по интервенцијата на американскиот претседател Доналд Трамп, негативно влијаела врз атмосферата во репрезентацијата пред поразот од Белгија на Светското првенство.
Во интервју за „CBS“, напаѓачот изјави дека целата ситуација предизвикала нервоза кај неговите соиграчи и внела дополнителен притисок пред осминафиналниот натпревар.
Балогун првично беше суспендиран по црвениот картон заработен на натпреварот против Босна и Херцеговина, но само 24 часа пред дуелот со Белгија, ФИФА ја поништи казната. Одлуката предизвика бројни реакции и обвинувања за политичко влијание врз светската куќа на фудбалот.
„Мојата прва реакција беше среќа што повторно сум во тимот. Но, веднаш знаев дека тоа ќе предизвика многу контроверзии. Кај соиграчите се чувствуваше нервоза, бидејќи ситуацијата беше навистина необична“, изјави Балогун.
Тој додаде дека било тешко целосно да се концентрира на натпреварот поради големиот медиумски притисок и неизвесноста околу неговиот настап.
Осврнувајќи се на црвениот картон, Балогун рече дека според него не станувало збор ниту за прекршок.
„Тоа не беше ниту прекршок, па бев целосно шокиран. Кога нешто не е намерно, не треба да биде црвен картон. Тоа беше несреќна ситуација, која ни создаде многу поголем притисок отколку што беше потребно“, изјави американскиот напаѓач.
