Поранешниот светски тениски шампион и тренер Борис Бекер смета дека не физичките проблеми, туку психолошкиот притисок бил клучната причина за шокантната елиминација на Јаник Синер на Ролан Гарос.
Првиот тенисер во светот приреди едно од најголемите изненадувања на гренд слем турнирите во последните години, откако во второто коло беше поразен од Хуан Мануел Серундоло, иако имаше убедлива предност и беше на чекор до победа.
По натпреварот, Синер изјави дека се соочувал со здравствени проблеми и дека поради болест останал без енергија, но Бекер не е убеден во тоа објаснување.
„За мене ова не е физички проблем, туку ментален. Не знаеме што се случува во неговата глава и колкав притисок си наметнува самиот. Рече дека не спиел добро, а кога премногу размислувате и сте нервозни, тешко е да заспиете“, изјави Бекер.
Германецот потсети дека Синер оваа сезона изгледал речиси непобедлив, освојувајќи ги турнирите во Монте Карло, Мадрид и Рим.
„Ова е најголемата сензација на гренд слем турнирите во последните неколку години. Синер беше сметан за непобедлив, а денеска двапати сервираше за победа и не успеа да го заврши мечот“, рече Бекер.
Тој додаде дека кај Италијанецот и претходно можеле да се забележат одредени слабости во долги и исцрпувачки натпревари.
Според Бекер, значајна улога одиграл и заморот наталожен по серијата успеси во текот на сезоната.
„Од почетокот на март постојано играше и победуваше. Но, во еден момент секој спортист се празни. Тој е само човек и имаше лош ден. Тешко ми беше да поверувам дека по два часа игра одеднаш почнал да покажува знаци на грчеви. Според мене, сè почна во главата“, оцени Бекер.
Сепак, легендарниот Германец го пофали Синер за начинот на кој го прифатил поразот, истакнувајќи дека не барал изговори и ја презел одговорноста за неуспехот.
