Белата куќа почна да им го ограничува пристапот на новинарите на CNN, MS NOW и Politico

Белата куќа започна со спроведување на одлуката на американскиот претседател Доналд Трамп за ограничување на пристапот на новинари од CNN, MS NOW и Politico, откако тој ги обвини медиумите за објавување „лажни вести“.

Новинарката на MS NOW, Акајла Гарднер, утрово пристигнала на работа во Белата куќа, но припадник на обезбедувањето ѝ кажал дека нејзината акредитација е деактивирана и не ѝ дозволил да влезе. Според неа, на прашањето зошто не може да влезе, ѝ било одговорено дека одлуката е донесена „над неговото ниво“.

— реклама —

Пристап не му бил дозволен ниту на фотографот на MS NOW, додека акредитацијата на една продуцентка од истата телевизија сè уште била активна и таа успеала да влезе во комплексот на Белата куќа, објави АП.

Трамп вчера на својата платформа Truth Social објави дека CNN, MS NOW и Politico „веднаш“ ќе бидат спречени да известуваат од Белата куќа, обвинувајќи ги за објавување „фикција и лаги“. Подоцна пред новинарите изјави дека не смета оти треба да им биде дозволено на медиумите да објавуваат, како што тврди, лажни стории за него.

— реклама —

Тој не посочи конкретен текст или прилог за кој смета дека содржи неточни информации, а најави и можност ограничувањето да биде проширено и на други медиуми.

MS NOW соопшти дека ќе ги преземе сите неопходни правни чекори за заштита на правата на своите новинари, загарантирани со Првиот амандман на американскиот Устав. Од медиумот порачаа дека ќе продолжат да известуваат за претседателот и неговата администрација.

— реклама —

CNN исто така застана зад своите новинари, нагласувајќи го нивното уставно право да известуваат од Белата куќа без мешање од власта. Politico, пак, најави дека ќе ги брани своите права на слободно известување.

Од Комитетот на известувачи за слободата на печатот оценија дека целосната забрана на пристап поради содржината на известувањето би била спротивна на американскиот Устав. Според организацијата, откако Белата куќа ќе им овозможи пристап на одредени новинари, не може да им го ускрати на други поради нивното известување.

Сличен спор меѓу администрацијата на Трамп и Асошиејтед прес се водеше и во 2025 година, кога на агенцијата ѝ беше ограничен пристапот до одредени настани во Белата куќа поради нејзината одлука да не ја прифати промената на името на Мексиканскиот Залив. Федерален суд тогаш заклучи дека власта не смее да казнува медиум поради уредничка одлука и нареди враќање на дел од пристапот.

Засега не е познато дали денеска на ист начин им бил оневозможен пристапот и на новинарите на CNN и Politico. Трамп викендов престојува во претседателското одморалиште Кемп Дејвид.