Основниот кривичен суд Скопје информира дека осудениот Бесим Красниќи не се вратил во КПУ-КПД „Идризово“ во рокот определен по истекот на прекинот на издржувањето на затворската казна.
Судот во мај годинава го уважил неговото барање за прекин на казната, земајќи ја предвид доставената медицинска документација и мислењата на надлежните лекари. Прекинот бил одобрен поради потребата од дополнителни медицински испитувања кои, според доставените наоди, не можеле да се спроведат во услови на казнено-поправната установа.
Од Судот појаснуваат дека при вакви одлуки се зема предвид здравствената состојба на осуденото лице, а прашањето дали потребното лекување може да се спроведе во затвор или е неопходно лекување надвор од установата е пред сè медицинско прашање.
По истекот на првично одобрениот прекин, Б.К. побарал негово продолжување. Судот со решение од 16 јуни 2026 година го одбил барањето, оценувајќи дека од доставената медицинска документација не произлегува потреба од дополнително лекување подолго од 30 дена надвор од установата.
Жалбата на осудениот била одбиена од Кривичниот совет на Основниот кривичен суд Скопје, со што било потврдено решението на судијата за извршување на санкциите.
На 10 јули в.д. директорот на КПУ-КПД „Идризово“, Зоран Јовановски, го известил судот дека Б.К. не се вратил во установата во определениот рок.
По добиеното известување, судот издал наредба за негово приведување, како и потерница доколку се утврди дека се крие или се наоѓа во бегство.
