Без владините мерки дизелот ќе беше поскап за 11 до 11,5 денари за литар, посочи премиерот

Дизелот во Македонија би бил поскап за 11 до 11,5 денари за литар доколку Владата не ги намалеше акцизата и ДДВ за горивата, тврди премиерот Христијан Мицкоски.

Тој денеска ги образложи ефектите од владините мерки, откако Владата донесе одлука ДДВ за горивата привремено да се намали од 18 на 10 проценти.

— реклама —

„Доколку не се донесеше оваа одлука и претходните одлуки за намалување на акцизата, дизелот ќе беше за 11 или 11,5 денари поскап по литар од тоа што е денеска“, рече Мицкоски.

Според премиерот, поради разликата во цените во последниот период е зголемена и потрошувачката на бензинските станици во земјава, а гориво доаѓаат да полнат и граѓани од соседните држави.

— реклама —

„Имајќи го предвид зголемениот конзум на бензинските во државата, особено поради притисокот на граѓаните кои доаѓаат од Грција, Албанија и Србија, стигнавме до два милиони литри гориво кое се точи тука“, изјави Мицкоски.

Тој тврди дека само по основ на дизел-горивото, дневната заштеда за македонските граѓани изнесува 250 милиони денари.

Владата претходно го намали ДДВ за горивата од 18 на 10 проценти, како дополнителна мерка по претходното намалување на акцизите. Намалената стапка ќе важи од 00:01 часот на 15 септември до полноќ на 28 септември.

— реклама —

Според владините пресметки, со интервенцијата кај дизелот, наместо очекуваното поскапување од околу пет денари, се очекува намалување на цената за околу два денари, односно ублажување на ценовниот удар за приближно седум денари. Цената би изнесувала околу 99 денари за литар.

Кај бензините, според истите пресметки, се очекува поскапување од околу 3,5 денари, со што ЕУРОСУПЕР БС-95 би изнесувал околу 100,5 денари, а ЕУРОСУПЕР БС-98 околу 102,5 денари за литар.

— реклама —

Од Владата мерките ги образложуваат со потребата да се заштити животниот стандард и стопанството во услови на енергетска криза и можни нарушувања во снабдувањето со нафта и нафтени деривати.