Загреб од денеска е дел од новата фаза на тестирање на автономниот превоз, откако компаниите „Верн“ и кинеската „Пони.аи“ започнаа пробни возења на роботакси без возач и без безбедносен оператор во возилото. Тестирањето се одвива на јавни сообраќајници, на 22-километарска траса што ја поврзува деловната зона Бузин со аеродромот „Фрањо Туѓман“. Компаниите наведуваат дека станува збор за прво тестирање од ваков вид на јавни патишта во Европа.
Досега во роботаксијата на „Верн“ за време на комерцијалните возења беше присутен безбедносен оператор кој можеше да преземе контрола врз возилото. Во новата тест-фаза оператор нема во кабината, туку системот за автономно возење самостојно управува со возилото, додека тимот на „Верн“ го следи од далечина. Според компаниите, операторите не управуваат со возилата од далечина.
Оваа фаза сè уште не е достапна за сите корисници. Возењето без оператор не може да се нарача преку апликациите на „Верн“ или „Убер“, туку станува збор за тестирање со поканети патници. Во следните месеци се очекува зоната на тестирање постепено да се проширува кон целото подрачје во Загреб каде што „Верн“ веќе ја нуди својата услуга.
Проектот го спроведуваат „Верн“, компанија од екосистемот на Мате Римац, „Пони.аи“, која ја обезбедува технологијата за автономно возење, и „Убер“, преку чија платформа во иднина треба да биде овозможено нарачување на роботаксијата.
„Верн“ соопшти дека неговите возила од почетокот на комерцијалната услуга во април имаат поминато повеќе од 200.000 километри во неколку илјади возења со корисници, со просечна оценка од 4,7 од 5.
Компанијата паралелно ја тестира и новата конфигурација на кабината. Предното совозачко седиште е отстрането, со што е ослободен дополнителен простор за багаж и голем екран. Со функциите на возилото и кабината се управува преку централен екран на допир поставен меѓу задните седишта.
Целосно автономните возења засега остануваат во тест-фаза, но нивното воведување претставува значаен чекор кон идната комерцијална употреба на роботаксија без човек зад воланот.
