Финска утрово активираше итни безбедносни мерки откако биле пријавени можни неидентификувани дронови над регионот Усима, вклучително и поширокото подрачје на Хелсинки.
На населението му било препорачано да остане во затворени простории додека трае проценката на ситуацијата, а надлежните служби започнале операции за надзор и контрола на воздушниот простор.
Одбранбени сили на Финска вовеле привремена зона со ограничување на летови за да се овозможи безбедно постапување и да се спречи неовластено движење во погодениот воздушен простор.
Истовремено биле привремено прекинати и пренасочени воздушниот и поморскиот сообраќај во поширокото подрачје на Хелсинки, вклучително и операциите на аеродромот Хелсинки-Ванта.
Полицијата соопштила дека повеќепати биле забележани дронови во јужниот дел на земјата, а во операцијата за надзор биле вклучени и воени авиони од типот McDonnell Douglas F/A-18 Hornet, кои патролирале над регионот Усима и околината на Хелсинки.
Финските служби за вонредни ситуации подоцна соопштиле дека безбедносната тревога е повлечена и дека ситуацијата е ставена под контрола, оценувајќи дека преземените мерки биле од превентивен карактер.
Финскиот премиер Петери Орпо им порача на граѓаните дека е „безбедно да се оди на училиште и на работа“, најавувајќи дополнително информирање на јавноста за инцидентот.
И покрај нарушувањата во утринскиот сообраќај, јавниот превоз во Хелсинки главно продолжил да функционира, иако дел од автобуски линии биле привремено укинати или прекинати.
