Бил Гејтс: Вештачката интелигенција би можела да предизвика милијарда жртви

Коосновачот на „Мајкрософт“, Бил Гејтс, предупреди дека вештачката интелигенција би можела да предизвика настани со милијарда жртви доколку биде злоупотребена од злонамерни лица.

— реклама —

Во интервју за Ен-би-си, Гејтс оцени дека вештачката интелигенција е доволно моќна за да предизвика последици со катастрофални размери и повика на воспоставување соодветни правила и надзор врз развојот на технологијата.

„Вештачката интелигенција секако е доволно моќна да предизвика настани што би довеле до милијарда мртви“, рече Гејтс, одговарајќи на прашањето дали технологијата би можела да го уништи човештвото.

— реклама —

Тој предупреди и на можноста моќните алатки за вештачка интелигенција да бидат искористени од злонамерни луѓе.

— реклама —

„Никогаш немало оружје толку моќно како комбинацијата од злонамерни луѓе и најновите алатки на вештачката интелигенција“, изјави Гејтс.

Според него, саморегулацијата не е доволна и потребно е во процесот да се вклучат надлежните институции и политичарите.

Дебатата за регулирањето на вештачката интелигенција повторно се засили по серија хакерски инциденти, по што водечки компании, меѓу кои „Опен АИ“ и „Антропик“, најавија подготвеност да го забават развојот на технологијата.