Блискиот Исток на раб на нова ескалација: Хамнеи погребан, Израел најавува нови напади врз Иран

Иранскиот врховен лидер ајатолах Али Хамнеи беше погребан во неговиот роден град Машхад, додека дипломатските напори за намалување на тензиите меѓу Иран и Соединетите Американски Држави продолжуваат во услови на кревко примирје и висока воена подготвеност во регионот.

Според американски претставник, во тек се дипломатски активности во кои посредуваат Катар и Пакистан со цел Техеран и Вашингтон повторно да седнат на преговарачка маса. Истовремено, американските сили остануваат во состојба на зголемена готовност, а на носачот на авиони „УСС Абрахам Линколн“ во Арапското Море се изведуваат подготовки и воени вежби за можни операции.

— реклама —

Во меѓувреме, два извора запознаени со ситуацијата тврдат дека Израел споделил со САД разузнавачки информации за нов наводен ирански план за атентат врз американскиот претседател Доналд Трамп.

— реклама —

За безбедносната состојба телефонски разговарале Трамп и израелскиот премиер Бенјамин Нетанјаху. Од кабинетот на Нетанјаху соопштија дека двајцата се договориле да продолжат со координацијата меѓу двете земји на повеќе безбедносни прашања.

Израелскиот министер за одбрана Израел Кац порача дека израелската армија е подготвена повторно да го нападне Иран доколку тоа биде потребно.

— реклама —

„Армијата е подготвена и во состојба на готовност повторно да воспостави воздушна надмоќ и повторно да нападне во Иран, па и по третпат ако биде неопходно“, изјави Кац.

Од друга страна, иранските државни медиуми објавија дека во текот на ноќта биле извршени повеќе напади врз воени цели во два града. Сепак, американски претставник за Си-Ен-Ен изјавил дека САД во моментов не изведуваат воени операции, додека израелски претставници соопштиле дека немаат информации за евентуална вмешаност на Израел во тие напади.

И покрај тензиите, техничките разговори меѓу САД и Иран за нуклеарната програма продолжуваат, со надеж дека ќе се дојде до дипломатско решение. Во исто време, поморскиот сообраќај низ Ормускиот Теснец засега не е прекинат, а танкери со течен природен гас и натаму минуваат низ овој стратешки важен пловен пат.