Германскиот Сојузен врховен суд ги отфрли тужбите на организацијата DUH против компаниите БМВ и Мерцедес, со кои се бараше забрана за продажба на нови возила со мотори со внатрешно согорување по октомври 2030 година.
Судот ги потврди одлуките на пониските инстанци, со што практично се затвора правниот пат за овие тужби во сегашниот облик. Организацијата DUH најави дека ја разгледува можноста за обраќање до Сојузниот уставен суд, но исходот е неизвесен.
Volkswagen не беше цел на DUH, но се соочи со многу слична правна постапка покрената од „Greenpeace“. Тој случај заврши во 2023 година кога беше пресудено дека судовите немаат овластувања да наметнуваат забрани за мотори со внатрешно согорување построги од сојузниот рок кој предвидува 2035 година.
Правната постапка, покрената во 2021 година, се темелеше на повикување на тужителите на општото право на лична слобода од германскиот Устав. Тие тврдеа дека БМВ и Мерцедес, трошејќи преголем дел од преостанатиот национален CO2 буџет, го ограничуваат просторот за идни политички одлуки. Според нив, тоа би довело до неизбежно воведување на порадикални мерки за намалување на емисиите во иднина, со што би се загрозиле нивните слободи.
Аргументот не беше без основа, бидејќи директно се потпираше на пресудата на Уставниот суд од 2021 година, со која беше утврдено дека тогашниот закон за заштита на климата префрла несразмерен товар за намалување на емисиите врз идните генерации. Сепак, Сојузниот уставен суд останува единствената преостаната опција за продолжување на постапката.
Засега, судот не го прифати ваквото толкување. Претседавачкиот судија наведе дека тужителите не се лично оштетени од постапките на компаниите, нагласувајќи дека концептот на CO2 буџет се однесува на државата во целина, а не на поединечни сектори или компании. Двете компании во текот на процесот тврдеа дека законодавецот, а не судот, е надлежен за утврдување на климатските обврски за економијата, што судот во голема мера и го потврди.
Одлуката јасно ги раздвојува обврските на државата и приватните компании во областа на климатската политика. Пресудата на Уставниот суд од 2021 година ја обврза државата да го заостри законодавството, но сега е потврдено дека таа логика не може да се прошири на приватните компании преку граѓански тужби. БМВ и Мерцедес ги почитуваат важечките ЕУ стандарди за емисии на CO2, а судот заклучи дека тоа е максимумот што може да се бара по судски пат.
