Пратеникот на ВМРО-ДПМНЕ, Миле Лефков, денеска излезе со серија обвинувања кон СДСМ, откако поранешниот директор на Царинската управа и поранешен потпретседател на партијата, Стефан Богоев, беше опфатен во истрагата што ја спроведуваат Финансиската полиција и Обвинителството.
Лефков тврди дека Богоев е осомничен за местење тендери за надворешно одржување на хигиена на гранични премини и царински терминали.
„Поранешниот потпретседател на СДС и поранешен директор на Царина, како и поранешен градоначалник на Карпош, Стефан Богоев е уапсен поради сомнение за местење на тендери за надворешно одржување хигиена на гранични премини и терминали“, изјави Лефков.
Тој посочи дека на веб-страницата за јавни набавки може да се видат повеќе тендерски постапки поврзани со оваа намена, за кои, според него, потпис ставил Богоев.
„Повеќето ги добиле јавни претпријатија, а два тендери кои ги добила битолска фирма се со највисока вредност и во износ од околу 350 илјади евра“, рече Лефков.
Во изјавата тој го спомена и Александар Спирковски – Џемо од Прилеп, за кого тврди дека е опфатен со истата истрага.
„Ова е вистинското лице на СДС. Афери, тендери, рекети и криминал. Одговорност за криминалите на СДС мора да има“, порача Лефков.
