Од ВМРО-ДПМНЕ обвинуваат дека СДСМ се обидува да ја избегне политичката одговорност за состојбата во Гостивар, иако, според нив, заедно со градоначалникот Лимани ја дели локалната власт.
На денешната прес-конференција, пратеникот и член на Извршниот комитет на ВМРО-ДПМНЕ, Миле Лефков, оцени дека СДСМ во изминатиот месец не побарал одговорност од Лимани, ниту ја признал сопствената политичка одговорност како партнер во локалната власт.
„Еден месец СДС бега од вистината, а таа е дека заедно со Лимани ја делат локалната власт, а со тоа и одговорноста за Гостивар“, изјави Лефков.
Тој обвини дека наместо да преземат одговорност за кризата со водоснабдувањето, од СДСМ продолжиле со обвинувања кон ВМРО-ДПМНЕ за состојбата на локално ниво.
Според Лефков, поради, како што рече, неспособноста на СДСМ, ДУИ и Партијата на Таравари, Владата предводена од ВМРО-ДПМНЕ морала да ги преземе работите во свои раце и да се вклучи во решавањето на кризата.
„Додека СДС беше зафатена со ширење хистерија и броење чешми низ државата, Владата предводена од ВМРО-ДПМНЕ од прв момент беше со граѓаните на Гостивар и ги презема сите мерки за надминување на кризата, а жителите секој ден бесплатно ги снабдуваше со вода“, рече Лефков.
Тој додаде дека надлежните институции постапиле и дека случајот се истражува, додека, според неговите информации, водата во Гостивар повторно е безбедна за пиење.
