Пратеникот на ВМРО-ДПМНЕ, Миле Лефков, на денешната прес-конференција упати сериозни обвинувања кон поранешниот директор на Царинската управа, Стефан Богоев, тврдејќи дека е осомничен за местење тендер вреден околу 300.000 евра и за примање поткуп од 2.000 евра.
Според Лефков, врз основа на јавно достапните информации, Богоев и поранешниот претседател на Општинската организација на СДСМ во Прилеп, Александар Спирковски – Џемо, договарале која фирма ќе го добие тендерот за одржување на хигиената на граничните премини и царинските терминали.
„Со тоа директно овозможиле правен субјект да се стекне со противправна имотна корист во износ поголем од 18 милиони денари“, изјави Лефков.
Тој додаде дека Богоев, покрај сомнежите за местење на тендерската постапка, се товари и за примање награда за противзаконито влијание во вредност од околу 2.000 евра.
Лефков оцени дека барањето за притвор за поранешниот директор на Царината укажува дека постојат сериозни докази во предметот и побара институциите целосно да го расчистат случајот.
„Очекуваме надлежните органи да ги разгледаат сите докази и овој случај да добие судска разрешница“, порача Лефков.
Од ВМРО-ДПМНЕ обвинија дека ваквите случаи се дел од, како што наведоа, долгогодишната практика на СДСМ поврзана со афери, тендери и злоупотреби, додавајќи дека јавноста заслужува целосно расчистување на наводите.
